06.04.2026 | 10:51
Հենրիխ Մխիթարյանը խաղադաշտ է վերադարձել իր նախկին թիմի դեմ գոլառատ խաղում․ ՏԵՍԱՆՅՈՒԹ
Ռուսաստանի և Նոր Նախիջևանի Հայոց թեմի հոգևորականներն իրենց հավատարմությունն են հայտնել կաթողիկոսին
Հասարակություն
30.11.2025 | 23:25
Ռուսաստանի և Նոր Նախիջևանի Հայոց թեմի հոգևոր սպասավորները հայտարարություն են տարածել, որով խստորեն դատապարտում են Հայաստանի Հանրապետության իշխանությունների կողմից իրականացվող հակաեկեղեցական արշավը։
Միաժամանակ, նրանք դատապարտում են այն եկեղեցականների կանոնազանց և պառակտիչ մոտեցումները, որոնք գործում են իշխանական շրջանակների տրամաբանության և համատեքստի մեջ։ Հոգևոր դասն իր հայտարարության մեջ ընդգծում է, որ Հայ Առաքելական եկեղեցու շուրջ տեղի ունեցող ներկայիս իրադարձությունները վտանգավոր բնույթ ունեն։
Հայտարարարությունում հոգևոր սպասավորները նշել են, որ Ամենայն Հայոց Կաթողիկոսի անունը Սուրբ պատարագի ժամանակ չհնչեցնելը լուրջ շեղում և Սուրբ պատարագի խորհրդի աղավաղում է։ Նրանք կարծում են, որ կաթողիկոս Գարեգին Երկրորդի դեմ հանդես եկած եկեղեցու սպասավորները համագործակցում են այն իշխանությունների հետ, որոնք, ըստ թեմի, խախտել են ՀՀ Սահմանադրությունը։
Ռուսաստանի և Նոր Նախիջևանի Հայոց թեմի հոգևորականները վերահաստատել են իրենց հավատարմությունը Մայր Աթոռ Սուրբ Էջմիածնին, եկեղեցական կանոնակարգին և անձամբ կաթողիկոս Գարեգին Երկրորդին։
Թեմից տեղեկացրել են նաև, որ Մասյացոտն թեմի առաջնորդ Գևորգ եպիսկոպոս Սարոյանի եղբայրը՝ Հակոբ քահանա Սարոյանը, որը երկար տարիներ է ծառայել Մոսկվայում, չի միացել այս հայտարարությանը։
