Զախարովան հայտարարել է, թե ԵՄ-ն ՀՀ-ում «հետախուզական առաքելություն» է տեղակայել

ՌԴ ԱԳՆ պաշտոնական ներկայացուցիչ Մարիա Զախարովան այսօրվա ճեպազրույցում խոսել է Հարավային Կովկասում, իր բնորոշմամբ, Արևմուտքի, «ապակառուցողական» քաղաքականության մասին։ Ըստ նրա՝ Եվրամիությունը փորձում է ամրապնդել իր ազդեցությունը Հայաստանում «դրամաշնորհների, քաղաքական ճնշման և տեղեկատվական մանիպուլյացիաների միջոցով»։ Նա կրկին մեղադրանքներ է հնչեցրել ՀՀ-ում ԵՄ առաքելության հասցեին։

«Ինչպես գիտեք՝ նրանք դիտորդական առաքելություն են տեղակայել Հայաստանում, փաստացի՝ հետախուզական առաքելություն։ Նրանք հանրապետությունը ներքաշում են իրենց ռազմաքաղաքական ուղեծիրը. մի խոսքով՝ նրանք ցանկանում են ոչնչացնել ռուս և հայ ժողովուրդների միջև դարավոր բարեկամությունը։ Եվ, իհարկե, այն պարադոքսալ բանաձևը, որը ԵՄ-ն առաջարկում է Հարավային Կովկասի երկրներին»,- ասել է նա՝ նշելով, թե Հայաստանին առաջարկվում է հետևել Մոլդովայի և Ուկրաինայի օրինակին։

Զախարովան նշել է, թե «դա առաջարկվում է նաև Հարավային Կովկասի պետություններին։ Նրանք ցանկանում են Եվրամիությունում տեսնել վասալներ, որոնք պատրաստ են դավաճանել իրենց ազգային շահերը»։

Անդրադառնալով «3+3» հարթակի հաջորդ հանդիպմանը՝ նա ասել է, թե Մոսկվան ակնկալում է, որ Երևանն ու Բաքուն արագ կհամաձայնեցնեն «3+3» ձևաչափով հաջորդ հանդիպումը կազմակերպելու հարցը։

«Մենք, մեր կողմից, կաջակցենք մեր գործընկերների համատեղ որոշմանը։ Այս տարի ադրբեջանական և հայկական կողմերը բազմիցս հանդիպել են Աբու Դաբիում, Վաշինգտոնում և Դուշանբեում։ Մենք հույս ունենք, որ նման անմիջական շփումները կօգնեն լուծել այս խնդիրը»,- հայտարարել է Զախարովան։

Ռուսաստանցի դիվանագետը նշել է, որ ձևաչափի հաստատման գործընթացը շարունակվում է, անցկացվել է երեք հանդիպում, և աշխատանքը կառուցված է «տարածաշրջանային խնդիրների տարածաշրջանային լուծումներ» սկզբունքի շուրջ։

Զախարովան կրկնել է, որ Վրաստանի համար հարթակի դռները բաց են։

Թարգմանությունը՝ Էմմա Չոբանյանի