«Հորս արև, ասա 5 հոգի բերում ա, թող 100 հազար տա»․ գումարով հավաքին մասնակցելու թեմայով ձայնագրության առթիվ վարույթ է նախաձեռնվել

Քննչական կոմիտեն վարույթ է նախաձեռնել երեկ համացանցում հայտնված ձայնագրությունների առթիվ, որում առերևույթ խոսակցություններ են հավաքին գումարի դիմաց մասնակցելու վերաբերյալ։

Քննչական կոմիտեի նախագահի մամուլի քարտուղար Կիմա Ավդալյանը Factor TV-ի հետ զրույցում ասաց, որ համացանցում հայտնված ձայնագրությունների առթիվ վարույթ է նախաձեռնվել Քրեական օրենսգրքի 236-րդ հոդվածի 2-րդ մասի հատկանիշներով (հավաք անցկացնելուն կամ դրան մասնակցելուն խոչընդոտելը կամ հարկադրելը, ինչպես նաև հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը):

Նշենք, որ համացանցում երեկ հայտնվել են ձայնագրություններ, որոնցում խոսակցություններ են գումարի դիմաց ինչ-որ երթի մասնակցելու վերաբերյալ։

Զրուցակիցներից մեկն ասում է, որ 20 000 դրամ աշխատելու տարբերակ է առաջարկում։

-«Իջնում ես քաղաք, մեր Գևորիկն ա կազմակերպում։
-Ի՞նչ Գևորիկ։
– Մեր Սամվել հոպարի։ Երթ ա։ Ընդեղ, մի մոմենտ երևա։
– Ապեր, հորս արև, ասա 5 հոգի բերում է, թող 100 հզ տա։
-10 000 ա, ես եմ ասել 20 000 տուր, հորս արև, տենց չի լինի։
– Ասա 10 հոգի բերում ա։
– Հենց հիմա բեր, հորս արև, 100 000 տա, շան տղա ըլնեմ, ասեմ, հանի, դնի ջեբդ։
-10 հոգի՞։
-Արա, ինչքան բերեց, հանի, դնի ջեբդ, էթալու ա ընդեղ՝ Արամ Խաչատրյանի արձանի մոտ։
-Չէ, էթանք Շինարարներ։
-Ախպերս, իջեք Արամ Խաչատրյան, ինքը ընդեղ ա, ասեմ հաշվի, տա ձեռդ՝ առանձին քեզի։
-Չէ, դե տենց կբռնվենք, թող գա, 100 հզ տա, 10 հոգի վեկալեմ, գնանք։
-Մի ժամից ա, 4-ին պիտի ընդեղ լինեն։
– Աղջիկ-մաղջիկ կլինի չէ՞։
-Տատի-աղջիկ, ինչ ուզում ա լինի, մի հոգին 10 000։
-Դե զանգի, ասա էսա ղրգում ա։ Ասա Հակոբը էսա 10 հոգի ղրգում ա, 100-ը գա վեկալի։

Ձայնագրություններն ամբողջությամբ՝ հետևյալ հղումով։

Ձայնագրությունների հրապարակմանը և ՔԿ-ի կողմից վարույթ նախաձեռնելուն ավելի ուշ արձագանքել է «Մեր ձևով» շարժման խոսնակը։  Մարիանա Ղահրամանյանը ֆեյսբուքյան էջում հակիրճ գրառում է արել․ «Ենթադրաբար, ԱԱԾ սպա Գևորիկը հանձնարարությունը լավ չի կատարել ու չի խոսում Տաշիրի բարբառով»։

Արաքս Մամուլյան