Տնտեսություն
11.10.2025 | 11:33
Հայաստանի էկոնոմիկայի նախարարի տեղակալ Անուշիկ Ավետյանը հոկտեմբերի 10-ին հանդիպել է Ենթակառուցվածքային ներդրումների ասիական բանկի (ԵՆԱԲ) փոխնախագահ Կոնստանտին Լիմիտովսկիի հետ․ այս մասին հաղորդագրություն է տարածել ՀՀ էկոնոմիկայի նախարարությունը։
Հանդիպման ընթացքում քննարկվել են համագործակցության հնարավոր ուղղությունները, ինչպես նաև ենթակառուցվածքների զարգացմանն առնչվող համատեղ ծրագրերը։
Փոխնախարարը ներկայացրել է ՀՀ կառավարության և էկոնոմիկայի նախարարության առաջնահերթությունները, զարգացման ռազմավարական ուղղությունները և ընթացիկ խոշոր ենթակառուցվածքային ծրագրերը։ Նա անդրադարձել է նաև սոցիալական նշանակության շինարարական նախագծերին՝ ընդգծելով, որ Հայաստանի անդամակցությունը ԵՆԱԲ-ին նոր հարթակներ կստեղծի միջազգային և տարածաշրջանային խոշոր ներդրումային ծրագրերին մասնակցելու համար։
Անուշիկ Ավետյանը կարևորել է ԵՆԱԲ-ի կողմից մասնավոր հատվածի ծրագրերի ֆինանսավորումը՝ ընդգծելով, որ այն կարող է էական խթան հանդիսանալ տնտեսական ակտիվության բարձրացման, ներդրումային միջավայրի բարելավման և երկրի սոցիալ-տնտեսական կայուն զարգացման ապահովման գործում, ինչպես նաև նպաստել պետական բյուջեի ծանրաբեռնվածության և արտաքին պարտքի նվազեցմանը։
Հանդիպման ընթացքում քննարկվել է նաև ՀՀ կառավարության «Խաղաղության խաչմերուկ» նախաձեռնությունը։
Կողմերը փաստել են, որ ԵՆԱԲ-ի և Հայաստանի միջև գործընկերային համագործակցությունը կարող է նոր հնարավորություններ ստեղծել տարածաշրջանային ինտեգրման, պետական և մասնավոր հատվածներում համատեղ ծրագրերի իրականացման և ներդրումային փոխգործակցության խորացման ուղղությամբ։
Պայմանավորվածություն է ձեռք բերվել նախանշել փոխգործակցության հիմնական շրջանակները, ինչի արդյունքում հնարավոր կլինի բացահայտել այն ոլորտները, որտեղ ԵՆԱԲ-ն իր մանդատի շրջանակներում, կամ այլ միջազգային դոնոր կազմակերպությունների հետ համագործակցությամբ կարող է մասնակցել ծրագրերի մշակմանն ու իրագործմանը։
