Հասարակություն
31.07.2025 | 18:12
«Արամ Խաչատրյան» համերգասրահում կայացել է «Երևան» երիտասարդական նվագախմբի՝ Բեռլինյան հյուրախաղերին նախորդող համերգը՝ մաեստրո Սերգեյ Սմբատյանի ղեկավարությամբ։ Նվագախմբի հետ ելույթ է ունեցել անվանի շեփորահար Սերգեյ Նակարյակովը՝ կատարելով Ալեքսանդր Հարությունյանի Շեփորի կոնցերտը։
Նվագախումբը նույն ծրագրով օգոստոսի 2-ին նորամուտի համերգով հանդես կգա Բեռլինի հռչակավոր “Konzerthaus Berlin” համերգասրահում։
Երևանի մշակութային կյանքում ներդրած նշանակալի ավանդի համար Երևանի քաղաքապետ Տիգրան Ավինյանը Հայաստանի պետական սիմֆոնիկ նվագախմբի հիմնադիր, գլխավոր դիրիժոր Սերգեյ Սմբատյանին պարգևատրել է «Արգիշտի Առաջին» հուշամեդալով:
Երևանի քաղաքապետարանի մշակութային ծրագրերում ցուցաբերած բարձր պատասխանատվության և պատշաճ ու բարեխիղճ աշխատանքի համար էլ «Էրեբունի- Երևան 2800-ամյակ» հուշամեդալով են պարգևատրվել «Հայաստանի պետական սիմֆոնիկ նվագախումբ» ՊՈԱԿ-ի նվագախմբի կոնցերտմայստեր Աննա Անդրիասովան և ֆլեյտահարների խմբի կոնցերտմայստեր Գևորգ Ավետիսյանը:
