Զելենսկին ստորագրել է Ուկրաինայի անվտանգության ծառայության լիազորություններն ընդլայնող օրենքը

Ուկրաինայի նախագահ Վլադիմիր Զելենսկին ստորագրել է օրենքը, որով ընդլայնվում են Ուկրաինայի անվտանգության ծառայության (ՈւԱԾ) լիազորությունները և ավելացվում է աշխատակիցների թիվը, գրում է DW-ի ռուսական ծառայությունը։ Այս մասին Ուկրաինայի նախագահը հայտարարել է իր տելեգրամի ալիքում հուլիսի 28-ին հրապարակված տեսաուղերձում։

«Այսօր ես ստորագրեցի օրենք, որով ամրապնդվում են Անվտանգության ծառայության ուժերը․ ծառայությանը տրվում են ավելի շատ հնարավորություններ իրականացնելու իր մարտական առաքելությունները և ոչնչացնելու օկուպանտին, անցկացնելու հատուկ գործողություններ Ուկրաինայի պաշտպանության համար», – ասել է Զելենսկին։

Մասնավորապես, կավելացվի Հատուկ գործողությունների կենտրոնի ՝ «Ալֆա» ստորաբաժանման անձնակազմի թիվը։ «Նրանք  ամենաարդյունավետ զինվորներից են», – հավելել է նա։

Գերագույն Ռադայի կայքում հրապարակված օրինագծի մեջ նշվում է, որ ռազմական դրության ժամանակ Ուկրաինայի հատուկ ծառայությունում կաշխատի առնվազն 10,000 մարդ։ Ընդհանուր առմամբ, խաղաղ ժամանակ Ուժային պաշտպանության ծառայության աշխատակիցների թիվը կկազմի 37,000, իսկ «հատուկ ժամանակահատվածում»՝ 41,000 մարդ։ Ռազմական դրության ժամանակ այն կորոշվի՝ կախված երկրի զորահավաքի պլանից։

Օրենքին կից հավելվածից պարզ է դառնում, որ ծառայության  աշխատակիցների ընդհանուր թիվը կավելանա 10 հազարով: Նախկին օրենքի համաձայն՝ Ուկրաինայի հատուկ ծառայությունում խաղաղ ժամանակ աշխատում էր 27 հազար մարդ, իսկ «հատուկ ժամանակահատվածում՝ 31 հազար:

Նախկին օրենքը չէր սահմանում «Ալֆա»-ի աշխատակիցների թիվը, սակայն, ինչպես հայտնել է Գերագույն ռադայի ազգային անվտանգության, պաշտպանության և հետախուզության հարցերով հանձնաժողովի քարտուղար,  անվտանգության ծառայության  գնդապետ Ռոման Կոստենկոն, այժմ այնտեղ ծառայում է մի քանի հազար մարդ, և ընդունված օրենքը կավելացնի անձնակազմը «երկու կամ նույնիսկ երեք անգամ»:

New York Times-ը հաղորդել է, որ  Ուկրաինայի Անվտանգության ծառայության ստորաբաժանումը կարևոր դեր է խաղացել Ուկրաինայի կողմից Կուրսկի շրջանի վրա անցյալ ամռանը իրականացված անակնկալ հարձակման ժամանակ, որի արդյունքում ուկրաինական զորքերը ութ ամիս շարունակ զբաղեցրել են Ռուսաստանի տարածքի մի մասը, նախքան այնտեղից դուրս մղվելը։

«Ալֆա»-ն մասնակցել է նաև «Սարդոստայն» գործողությանը․ ռազմական օդանավակայաններին հարվածները հասցվել էին  բեռնատարներով մեկնարկի վայրեր տեղափոխված անօդաչու թռչող սարքերով։

Թարգմանությունը՝ Էմմա Չոբանյանի