Հունան Պողոսյանին մարզպետ նշանակելը նշանակում է ստորացնել սյունեցիներին․ Նինա Կարապետյանց

Հեղափոխությունից հետո, թեև Կառավարության ղեկավարի կողմից եղան նշանակումներ, որոնք ընդունվեցին վերապահումներով, սակայն Հունան Պողոսյանի նշանակումը Սյունիքի մարզպետի պաշտոնում բոլորովին այլ հարցեր է առաջացնում։ Այս մասին այսօր հրավիրված մամուլի ասուլիսի ժամանակ ասաց «Հելսինկյան ասոցիացիա» իրավապաշտպան կազմակերպության ղեկավար Նինա Կարապետյանցը։

«Այն մարզում, որտեղ  նա նշանակվեց մարզպետ, տեղի էին ունենում բացառիկ հանցագործություններ՝ իրենց որակով և լկտիությամբ, և նույն Հունան Պողոսյանը որևէ բան չէր ձեռնարկում դրանք բացահայտելու ուղղությամբ, հիմա ուզում եմ հասկանալ՝ ի՞նչ է փոխվել Հունան Պողոսյանի մեջ հեղափոխությունից հետո, որը առիթ է տալիս ենթադրելու, որ նա կաշխատի ազնվորեն»,- ասաց Կարապետյանցը՝ շեշտելով, որ հասարակության մեջ ձևավորված քննադատության բուռն ալիքը ոչ թե քաղաքական ռասսիզմի մասին է վկայում, այլ ընդամենը արդարացի պահանջ է՝ պատասխանատվություն ենթարկել այն պաշտոնյաներին, որոնց արարաքների մեջ հանցագործության տարրեր կան։

«Որևէ մեկը չի ասում, որ բոլոր հանրապետականներին պետք է շարել պատերի տակ և գնդակահարել»,- ասաց նա՝ շեշտելով, եթե այսօրվա իշխանությունը չպատժի նման պաշտոնյաներին՝ տարիներ անց կրելու է դրա պատասխանատվությունը։

Կարապետյանցը նաև շեշտեց՝ նման պաշտոնյաների տարբեր պաշտոնների նշանակելու միանձնյա իրավունք որևէ մեկը չունի՝ ընդհուպ վարչապետի պաշտոնակատար Նիկոլ Փաշինյանը։ «Որևէ մեկն իրավունք չունի միանձնյա նման որոշում  կայացնելու և անգամ դա չի կարող անել կիսաստվածային վիճակում գտնվող Նիկոլ Փաշինյանը»,- ասաց նա՝ շեշտելով, որ Հունան Պողոսյանին մարզպետ նշանակելը նշանակում է ստորացնել սյունեցիներին։

Հիշեցնենք, որ նախկին ոստիկանապետի առաջին տեղակալ Հունան Պողոսյանը Սյունիքի մարզպետի պաշտոնում նշանակվեց օրերս՝ Կառավարության արտահերթ նիստի ընթացքում, և այս նշանակման վերաբերյալ վարչապետի պաշտոնակատար Նիկոլ Փաշինյանը նշեց, որ եկել է բարիկադները քանդելու ժամանակը։