06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
37 մլն դրամ՝ պետությունից, 0 դրամ՝ անդամավճար․ «Հանրապետություն» կուսակցության մուտքերն ու ելքերը
14.07.2025 | 17:00
2024 թվականին Արամ Սարգսյանի ղեկավարած «Հանրապետություն» կուսակցության 38․4 մլն դրամ ֆինանսավորումից 37․2 մլնն ապահովվել է պետական բյուջեի միջոցների հաշվին։ Ըստ կուսկացության 2024-ի հաշվետվության՝ «Հանրապետություն»-ն անցած տարի ստացել է միայն բյուջետային ֆինանսավորում և 1․2 մլն դրամի բնեղենով նվիրատվություն։ Կուսակցականները նաև անդամավճարներ չեն վճարել։
«Հանրապետության» ծախսը 2025-ին կազմել է 33․4 մլն դրամ, որի մեծ մասը՝ մոտ 23․5 մլնը, հաշվետվությունում նշված է «այլ ելքեր» տողով և հայտնի չէ, թե ինչ նպատակով է ծախսվել։ Կուսկացությունը 7․3 մլն դրամ ծախսել է աշխատանքի վարձատրության, 2․5 մլն դրամ՝ հարկերի,131 հազար դրամ՝ կոմունալ վճարների համար։
Կուսակցության բնեղենով նվիրատվություններն անշարժ գույքեր են, որ սեփականատերերը շուկայական արժեքից էականորեն ցածր գնով են վարձակալության տվել, մասնավորապես՝ Սուսաննա Պետրոսյանը՝ հասարակական նշանակության շինություն՝ 533 հազարով, Մուշեղ Ասլանյանը՝ անհատական բնակելի տուն՝ 10,870 դրամով, Նաիրա Հակոբյանը՝ բազմաբնակարան բնակելի շենք՝ 100,588 դրամով, Ռոմիկ Պողոսյանը՝ անհատական բնակելի տուն՝ 30,160 դրամով, Հասմիկ Գզոյանը՝ անհատական բնակելի տուն՝ 106,196 դրամով, և Արամ Սարգսյանը՝ հասարակական նշանակության շինություն՝ 223,440 դրամով։ Ուշագրավ է, որ այս նույն անձանցից, բացի Սուսաննա Պետրոսյանից, և Ելենա Ասրիյանից կուսակցությունը այլ ոչ դրամական նվիրատվություններ է ստացել՝ ընդհանուր 203 հազար դրամի չափով։
Հավելենք, որ աուդիտը դրական է գնահատել «Հանրապետություն» կուսակցության 2024 թվականի հաշվետվությունը։
Գայանե Խաչատրյան
