29.04.2026 | 14:50
Որքան է կազմելու Հայաստանում «Յուվենտուսի» ակադեմիայի ամսական վճարը. ծրագրի մանրամասներն ու նախագրանցման մեկնարկը․ ՏԵՍԱՆՅՈՒԹ
Իրանը հայտարարում է, որ Իսրայելի հարվածների հետևանքով զոհերի թիվը հասել է 935-ի
Քաղաքականություն
30.06.2025 | 20:39
Իրանի դատական համակարգի խոսնակ Ասղար Ջահանգիրը հայտարարել է, որ Իսրայելի հետ 12-օրյա պատերազմի ընթացքում Իրանում զոհվել է 935 մարդ։ Այս մասին հայտնում է Reuters-ը, որին վկայակոչում է Al Arabiya-ն։
Ըստ նրա՝ զոհվածների թվում են 38 երեխա և 132 կին։ Նախորդ երեքշաբթի հրադադարի ուժի մեջ մտնելուց առաջ Իրանի Առողջապահության նախարարությունը հայտնել էր 610 զոհի մասին։
Ջահանգիրը նաև թարմացրել է Թեհրանի Էվին բանտի վրա Իսրայելի կողմից հասցված հարվածի հետևանքով զոհվածների թիվը՝ նշելով, որ ցուցանիշը 71-ից հասել է 79-ի։
Իսրայելն Իրանի դեմ օդային պատերազմ էր սկսել հունիսի 13-ին՝ հարձակվելով Իրանի միջուկային օբյեկտների վրա և սպանելով բարձրաստիճան զինվորականների, ինչպես նաև քաղաքացիական անձանց, ինչը Իսլամական Հանրապետությանը հասցված ամենածանր հարվածն էր 1980-ականներին Իրաքի հետ պատերազմից ի վեր։ Իրանը հակադարձել էր հրթիռային հարվածներով Իսրայելի ռազմական օբյեկտներին, ենթակառուցվածքներին և քաղաքներին։ Միացյալ Նահանգները պատերազմի մեջ մտավ հունիսի 22-ին՝ հարվածներ հասցնելով Իրանի միջուկային օբյեկտներին։
Իրանի ԱԳՆ խոսնակ Էսմայիլ Բաղային էլ ասել է, որ Իսրայելի «ագրեսիայի ակտը հանգեցրել է բազմաթիվ ռազմական հանցագործությունների»։ Ըստ նրա՝ Իրանն ապացույցներ կփոխանցի միջազգային կազմակերպություններին, որոնք պետք է պատասխանատվության ենթարկեն Իսրայելին։
«Սիոնիստական ռեժիմի գործողությունները կատարվել են առանց որևէ պատճառի կամ արդարացման, հետևաբար, մենք չենք հավատում զինվորականների և քաղաքացիական [զոհերի] տարանջատմանը»,- լրագրողներին ասել է Բաղային։
Նա ասել է, որ ցանկացած «նահատակ կամ ավերված շենք ռազմական հանցագործությունների օրինակ է»։
