23.05.2026 | 20:32
Մենք ամենափորձառու ուժն ենք, իշխանությունը մեր դեմ դնելու բան չունի. Էդմոն Մարուքյան. ՏԵՍԱՆՅՈՒԹ
Ե՞րբ Հայաստանի ավիաընկերությունները կկարողանան թռիչքներ իրականացնել ԵՄ տարածքում
Տնտեսություն
30.06.2025 | 14:50
ԵՄ Շարժունակության և տրանսպորտի հարցերով գլխավոր տնօրինության մասնագետները մտադիր են մինչև այս տարվա վերջ այցելել Հայաստան՝ գնահատելու ՀՀ քաղաքացիական ավիացիայի կոմիտեի իրականացրած աշխատանքը և ԵՄ թռիչքներ կատարելու արգելքի (այսպես կոչված՝ «սև ցուցակ») վերացման հնարավորությունը։
Հայաստանի ավիացիան, հիշեցնենք, Եվրամիության «սև ցուցակում» է հայտնվել 2020 թվականի հունիսից, ինչի հետևանքով արգելվել է հայկական ավիափոխադրողների մուտքը ԵՄ օդային տարածք։
Կոմիտեից Factor.am-ին վստահեցրել են, որ վերացրել են 2020 թվականին Եվրոպական հանձնաժողովի կողմից հայկական ավիաընկերություններ և կոմիտե կատարած գնահատողական այցի շրջանակներում հայտնաբերված հիմնական թերությունները, ապա 2024-ի հոկտեմբերի 1-ին դիմել են ԵՄ Շարժունակության և տրանսպորտի հարցերով գլխավոր տնօրինություն՝ նախաձեռնելով դեպի ԵՄ «սև ցուցակից» հայկական ավիաընկերություններին դուրս բերելու գործընթացի մեկնարկը։ 2024-ի դեկտեմբերին կոմիտեն կատարած ուղղիչ գործողությունները և դրանց իրականացումը հավաստող փաստաթղթերը պաշտոնապես ներկայացրել է ԵՄ Շարժունակության և տրանսպորտի հարցերով գլխավոր տնօրինություն՝ վավերացնելու և համապատասխան որոշում կայացնելու համար։
Մեր հարցին՝ Կոմիտեն ներկայում ունի՞ բավարար կադրեր՝ ԵՄ ստանդարտներին համապատասխանելու համար, Կոմիտեից պատասխանել են, որ համալրել են անհրաժեշտ քանակությամբ մասնագետներին, որոնք պարբերաբար վերապատրաստումներ են անցնում։ Օրինակ՝ 2024-ին վերապատրաստումների համար ծախսվել է 71․4 մլն դրամ։
Թե ինչքա՞ն է գնահատվում ԵՄ «սև ցուցակում» հայտնվելու պատճառով Հայաստանի կրած վնասը, Կոմիտեից չեն պատասխանել՝ նշելով, թե «հարցադրումը դուրս է կոմիտեի իրավասության շրջանակներից»։
Նշենք, որ ներկայում Հայաստանում օդանավ շահագործողի վկայական ունի 7 ընկերություն։
Գայանե Խաչատրյան
