Մայր Աթոռը դեռ չի արձագանքել Բագրատ Գալստանյանի ձերբակալությանը և խուզարկություններին

Այսօր վաղ առավոտից «Սրբազան պայքարի» ղեկավար կազմի և համակիրների տների խուզարկությունների և ձերբակալություններին Մայր Աթոռը դեռևս որևէ ձևով չի արձագանքել։ Factor TV-ի հետ զրույցում Մայր աթոռի տեղեկատվական համակարգի տնօրեն Տեր Եսայի քահանա Արթենյանն ասաց՝ որևէ հայտարարություն, եթե լինի, հանրությունը կիմանա այդ մասին։

Հիշեցնենք՝ կեսօրին իր կեցավայրից բերման ենթարկվեց «Սրբազան պայքար»-ի առաջնորդ Բագրատ Գալստանյանը։ Խուզարկություն էր նաև ընդդիմադիր պատգամավոր Արթուր Սարգսյանի տանը։ Խուզարկություններին զուգահեռ՝ Քննչական կոմիտեն մի քանի հաղորդագրություններ, ձայնագրություններ և լուսանկարներ հրապարակեց, հայտնելով «ահաբեկչական և իշխանությունը զավթելուն ուղղված գործողությունների» բացահայտման մասին:  Խուզարկություններ են իրականացվել նաև ՀՅԴ մի շարք անդամների բնակարաններում։ 

Փաստաբան Սերգեյ Հարությունյանը լրագրողների հետ զրույցում հայտարարեց, որ սա հերթական «շոու»-ն է՝ կապված երեկ իշխանական մամուլի կողմից հրապարակված «հեղաշրջման պլանի» հետ:

Քիչ առաջ Քննչական կոմիտեն հայտնեց, որ այս պահին կա 14 ձերբակալված անձ: 16 անձի նկատմամբ հանրային քրեական հետապնդում հարուցելու որոշում է ընդունվել, որոնք բավարարվել են.

««Սրբազան պայքար» շարժման ղեկավարների և մասնակիցների կողմից ահաբեկչության և իշխանությունը յուրացնելու նախապատրաստություն կատարելու դեպքերի առթիվ քրեական վարույթի շրջանակներում իրականացվել են ավելի քան 9 տասնյակ խուզարկություններ, որոնց արդյունքում հայտնաբերվել են նշված հանցագործություններին առնչվող, նախաքննությամբ ձեռք բերված տվյալները հաստատող առարկաներ և փաստաթղթեր, ինչպես նաև ապացուցողական նշանակություն ունեցող անհերքելի այլ փաստական տվյալներ, այդ թվում՝ հրազեն և ռազմամթերք, գործողությունների պլաններ, հավաքագրված անձանց ցուցակներ, մետաղական իրեր, ճայթրուկներ, ծխարձակող միջոցներ, զինվորական հանդերձանք, ռադիոկապի միջոցներ, անօդաչու թռչող սարքեր, թմրամիջոցին նմանվող բուսական զանգվածներ»։

Բացի այս, ըստ ՔԿ-ի, հայտնաբերվել է բռնի կերպով իշխանությունը յուրացնելուց հետո գործադիր իշխանության համապատասխան պաշտոններում նշանակվող անձանց ցուցակ, «խմբի կողմից իրականացվելիք ապօրինի գործողությունների մանրակրկիտ պլանավորման, դրանց հերթականության, ժամանակագրության վերաբերյալ փաստաթղթեր և այլն»:

Ռոզա Վարդանյան