«Իսրայե՛լ, մի՛ գցիր այդ ռումբերը»․ Թրամփը հայտարարել է, որ Իսրայելն ու Իրանը խախտել են հրադադարը

ԱՄՆ նախագահ Դոնալդ Թրամփը քննադատել է Իսրայելին և Իրանին հրադադարի ռեժիմը խախտելու համար՝ հավելելով, որ իրեն դուր չի եկել, որ Իսրայելը «հարվածել է անմիջապես այն բանից հետո, երբ նրանք համաձայնվել են դադարեցնել ռազմական գործողությունները», գրում է France 24-ը։

Նա  լրագրողների հետ զրույցում ասել է, որ և՛ Իսրայելը, և՛ Իրանը խախտել են մի քանի ժամ առաջ իր հայտարարած հրադադարը, և ինքը գոհ չէ ոչ մի երկրից, հատկապես Իսրայելից։

«Երկու կողմերն էլ խախտել են հրադադարը։ Նրանք խախտել են այն, բայց Իսրայելը նույնպես խախտել է այն։ Ես գոհ չեմ Իսրայելից», – ասել է Թրամփը ՆԱՏՕ-ի գագաթնաժողովին մեկնելուց առաջ՝ անդրադառնալով ԱՄՆ-ի միջնորդությամբ կնքված հրադադարին, որը հայտարարվել էր մի քանի ժամ առաջ և հաստատվել երկու կառավարությունների կողմից։

Նա չի մանրամասնել, թե որ կողմն է առաջինը խախտել հրադադարը, բայց հավելել է․«Ինձ դուր չեկավ, որ Իսրայելը սկսեց անմիջապես այն բանից հետո, երբ մենք համաձայնեցինք հրադադարի մասին»։

Այս մեկնաբանությունները հաջորդում են Թել Ավիվից և Թեհրանից ստացված հակասական հաղորդագրություններին այն մասին, թե ով է նախաձեռնել հարվածները հրադադարի ուժի մեջ մտնելուց հետո։ Իսրայելը հայտարարել էր, որ Իրանը բալիստիկ հրթիռներ է արձակել իր տարածքի վրա, մինչդեռ Իրանը հերքել էր մեղադրանքները և հայտարարել, որ Իսրայելը շարունակել է հարվածներ հասցնել  հրադադարի սկսվելուց մեկ ժամ անց։

Թրամփը նաև հայտարարություններ է արել Իրանի միջուկային կարողությունների մասին։ «Իրանը երբեք չի վերականգնի իր միջուկային ծրագիրը։ Նրանց միջուկային կարողությունները սպառվել են»,- ասել է նա։

Trurth Social սոցցանցում գրառմամբ էլ Թրամփը դիմել է Իսրայելին։

«Իսրայե՛լ։ Մի՛ գցիր այդ ռումբերը։ Եթե դուք անեք դա, դա մեծ խախտում կլինի։ Տո՛ւն վերադարձրեք ձեր օդաչուներին, հիմա՛»,-գրել է ԱՄՆ նախագահը։

Թարգմանությունը՝ Էմմա Չոբանյանի