Ուխտագնացություն և երթ՝ ի պաշտպանություն Հայ Առաքելական Եկեղեցու. Փաշինյանը հերթական գրառումն է արել

Այսօր Հայ առաքելական եկեղեցին նշում է Կաթողիկե Սուրբ Էջմիածնի տոնը, ինչի առիթով պատարագ է մատուցվում Մայր տաճարում։ Պատարագի ավարտին Ամենայն Հայոց Կաթողիկոսի հանդիսապետությամբ կկատարվի հայրապետական մաղթանք: Տոնի առիթով դուրս կբերվեն Սուրբ Էջմիածնի սրբազան մասունքները:

Օրվա առթիվ և ի պաշտպանություն եկեղեցու՝ դեպի Մայր Աթոռ ուխտագնացություն և երթ է անցկացվում, որին մասնակցում են ընդդիմադիր խորհրդարանական՝ «Պատիվ ունեմ» խմբակցության պատգամավորները, մի շարք ընդդիմադիր գործիչներ և հավատավոր քաղաքացիներ:

Մայր Աթոռի բակում լրագրողների հետ ճեպազրույցում Մայր աթոռի տեղեկատվական համակարգի տնօրեն Տեր Եսայի քահանա Արթենյանն ասաց, որ տոնը հավատացյալ ժողովրդի համար ուխտագնացության օր է եղել, իսկ այս տարի բացառիկ է նաև նրանով, որ հանվել են 7 սրբությունները:

Անդրադառնալով եկեղեցու շուրջ ստեղծված իրավիճակին՝ Տեր Եսայի քահանա Արթենյանը նշեց:

«Բոլոր ժամանակներում եկեղեցին իր առաքելությունն իրականացրել է անշեղորեն, որևէ փոփոխություն չի եղել երբևէ: Իսկ, թե իշխանությունները որտեղ են խնդիր տեսնում, չգիտեմ, գուցե, իրենք կարող են շատ ավելի հստակ ձևակերպել: Այս ընթացքում փորձել են ձևակերպումներ տալ, իհարկե, երբեմն խեղաթյուրելով իրողությունները: Մեր ուղեծրում որևէ բան չի փոխվել: Չի հաջողվելու եկեղեցում պառակտում մտցնել. հոգևորականները` թե՛ ամուսնացյալ, թե՛ կուսակրոն, համախմբված են և միաբան: Էժան մանիպուլյացիաները երբևէ չեն աշխատելու»,- ասաց նա:

Նշենք, որ այս առիթով ֆեյսբուքյան իր էջում գրառում է կատարել վարչապետ Նիկոլ Փաշինյանը։ Նա գրել է․ «Այսօրվա քարոզը լավ առիթ է, որ Կտրիճ Ներսիսյանը հանրությանը ներկայացնի իր տիկնոջը և զավակին։

Պարզաբանի, թե իրեն հայտնի պոռնկացումներից հետո ինչու՞ է Սամվել Խաչատրյանին պահում վեղարի տակ։

Բացահայտի մոմի վաճառքի շահույթը ինչպե՞ս է բաշխվում Կարոյի և Եզրասի միջև․ 50/50՞, թե այլ տրամաբանությամբ։

Բարձրաձայնի, որքա՞ն է կազմել այդ շահույթը 2024 թվականին։

Նաև բացատրի, ինչու՞ այդ շահույթներից Կարոն և Եզրասը վճարումներ չեն անում ՀՀ պետական բյուջե»։

Մանյա Պողոսյան