15.04.2026 | 13:45
ԱՄՆ-ը վերականգնել է ռուսական նավթի դեմ պատժամիջոցները, որոնք մեղմացվել էին Իրանի հետ պատերազմի պատճառով
Անահիտ Ավանեսյանը՝ տուբդիսպանսերը Երևան տեղափոխելու և բուժանձնակազմի հավանական կրճատումների մասին․ ՏԵՍԱՆՅՈՒԹ
21.06.2025 | 15:15
«Որոշակի հիվանդությունների սպասարկման ծավալները զարգացման տեմպերին համահունչ նվազում են»,- առողջապահության նախարար Անահիտ Ավանեսյանն այս հիմնավորումն է ներկայացրել Factor TV-ի հետ զրույցում՝ անդրադառնալով «Թոքաբանության ազգային կենտրոնի» և «Ինֆեկցիոն հիվանդությունների կենտրոնի» միավորմանը։
«Այս պահին մենք իրականացրել ենք իրավաբանական միավորում։ Այսինքն՝ դեռ ֆիզիկապես տեղափոխման փուլին չենք հասել։ Նորքում կառուցվում է ինֆեկցիոն հիվանդությունների նոր կենտրոն։ Մեր նպատակն է, որ նմանատիպ մի կենտրոն կառուցվի նաև տուբերկուլոզով հիվանդների սպասարկման համար։ Ունենալու ենք ինֆեկցիոն հիվանդությունների մեկ կենտրոն»,- ասաց նախարարը։
Անահիտ Ավանեսյանը նշեց, որ մասնավորապես տուբերկուլոզով հիվանդները բարձրորակ դեղորայք են ստանում տնային պայմաններում, ուստի՝ շենքային պայմանների պահպանման համար ծախս կատարելն արդյունավետ չէ։
«Թոքաբանության ազգային կենտրոնը» գտնվում է Աբովյան քաղաքում։ Հարցին, թե երբ կտեղափոխվեն կենտրոնի ծառայությունները Երևան, նախարարը պատասխանեց, որ դա կախված է Նորքում կառուցվող շենքի շինարարական աշխատանքների ավարտից։ Ներկայում կենտրոնի աշխատակիցների շրջանում մտավախություն կա, որ օպտիմալացման հետևանքով կարող են գործազուրկ դառնալ։ Հարցին, թե ինչ լուծումներ են առաջարկվում բուժանձնակազմին, նախարարն արձագանքեց․ «Մեր բուժաշխատողներին որոշակի առաջարկներ ենք ներկայացնում՝ օրինակ՝ մոտակա մարզերում զբաղվածություն ապահովելով։ Վերապատրաստում անցնելուց հետո, ցանկության դեպքում, կկարողանան աշխատանք գտնել»,- ասաց նախարարը։
Ավանեսյանը նշեց, որ դեռևս չի քննարկվել, թե ինչ նպատակի կծառայի «Թոքաբանության ազգային կենտրոնի» ներկայիս շենքը։
Մանրամասները՝ տեսանյութում։
Նարեկ Կիրակոսյան
