21.02.2026 | 15:17
Օդի ջերմաստիճանը ողջ հանրապետությունում կնվազի ևս 5-8 աստիճանով
Սոցցանցերի, VPN ծառայությունների և օգտատերերի 16 միլիարդ մուտքանունների և գաղտնաբառերի արտահոսք է տեղի ունեցել. Cybernews
Հասարակություն
21.06.2025 | 13:15
Cybernews-ի հետազոտողները պարզել են, որ օգտատերերի 16 մլրդ մուտքանուններ և գաղտնաբառեր սոցիալական ցանցերի, VPN ծառայությունների, կորպորատիվ հարթակների և մշակողների պորտալների արտահոսք է տեղի ունեցել, գրում է Current time-ը։
Ընդհանուր առմամբ, բաց տիրույթում հայտնաբերվել է 30 տվյալների հավաքածու, որոնցից յուրաքանչյուրը պարունակել է տասնյակ միլիոնից մինչև 3.5 միլիարդից ավելի գրառում։ Արտահոսած տվյալների մեծ մասն ունեցել է հստակ կառուցվածք՝ URL, մուտքի տվյալներ և գաղտնաբառ։
Հետազոտողները զգուշացնում են, որ արտահոսած տեղեկատվությունը հնարավորություն է տալիս մուտք գործել «գրեթե ցանկացած առցանց ծառայություն, որը կարելի է պատկերացնել՝ Apple-ից, Facebook-ից և Google-ից մինչև GitHub, Telegram և տարբեր պետական ծառայություններ»։
Նշվում է, որ սա պատմության մեջ տվյալների ամենամեծ արտահոսքներից մեկն է։
«Սա պարզապես արտահոսք չէ․ բացահայտված ավելի քան 16 միլիարդ մուտքի գրառումներով կիբերհանցագործները աննախադեպ հասանելիություն ունեն տվյալներին, որոնք կարող են օգտագործվել հաշիվների զավթման, անձնական տվյալների գողության և նպատակային ֆիշինգի համար», – ասվում է հայտարարության մեջ։
Հետազոտողներն ընդգծում են, որ նման տվյալները «հատկապես վտանգավոր են դառնում այն կազմակերպությունների համար, որոնք չունեն օգտահաշիվների նույնականացման պրակտիկա»։
Թարգմանությունը` Էմմա Չոբանյանի
