13.01.2026 | 15:15
Երբ ադրբեջանական զորքերը դուրս կգան ՀՀ տարածքից՝ ըստ Պապիկյանի//ՀՅԴ-ն ընտրությունների դաշինքով կգնա․ ԼՈՒՐԵՐ
Դատարանը քննեց Սերժ Սարգսյանի վերաբերյալ երկու գործերը մեկ վարույթում միացնելու հարցը
Հասարակություն
10.06.2025 | 18:23
Հայաստանի երրորդ նախագահ Սերժ Սարգսյանի գործով երկու դատական նիստերը մակագրվել են դատավոր Արամ Գրիգորյանին: Դատարանն այսօր քննության առարկա դարձրեց Սարգսյանի երկու գործերը մեկ վարույթում միացնելու հարցը, սակայն վերջնական որոշում չկայացրեց:
Նշենք, որ Սարգսյանի վերաբերյալ դատարան ուղարկված գործերից մեկը, որն այսօր է քննվում, վերաբերում է Սերժ Սարգսյանի՝ պաշտպանության նախարարի պաշտոնում աշխատելու շրջանում, 2005-2007 թվականներին, Իսակովի պողոտայում ՊՆ-ին պատկանող հողերը շուկայականից էժան գնով ուղղակի վաճառքով օտարելուն:
Մյուս գործը, որն օրեր առաջ է ուղարկվել դատարան, վերաբերում է գործարար Սիլվա Համբարձումյանից 2008 թվականին կաշառք վերցնելուն:
Երկու գործերը մեկ վարույթում միացնելու միջնորդությունը դատարանին ներկայացրեց Սարգսյանի պաշտպաններից Ամրամ Մակինյանը: Մեղադրող Գորիկ Հովակիմյանը, սակայն, նշեց, որ այս պահին դիրքորոշում հայտնել չի կարող, քանի որ մյուս գործով ինքը հանրային մեղադրող չէ, գործի ծավալին և հանգամանքներին ծանոթ չէ և չի կարող այս պահին դիրքորոշում հայտնել՝ երկու գործերը մեկ վարույթում միացնելը նպատակահարմա՞ր է, թե՞ ոչ:
Դատարանն էլ նշեց, որ որոշում կայացնելու համար պետք է լսել նաև մյուս գործով հանրային մեղադրողին և դատավարության մյուս մասնակիցներին, ուստի այս պահին միջնորդության լուծումը հետաձգվեց:
Արաքս Մամուլյան
