Էլեկտրոնային փոստերի վրա են եղել հարձակումները․ մեդիափորձագետը՝ ՀՀ պետական կառույցների վրա հաքերային հարձակման մասին

«Թիրախում երեք անգամ եղել է ԱԳՆ-ն, մեկ անգամ՝ առողջապահության նախարարությունը, բայց մենք գիտենք միայն այն օրերը, որոնք այդ փաստաթղթում կան, չի բացառվում, որ ուրիշ հարձակումներ էլ եղած լինեն»,- The Insider կայքի հետաքննության մասին ասում է մեդիափորձագետ Սամվել Մարտիրոսյանը։

Հիշեցնենք՝ The Insider-ին հաջողվել է բացահայտել ՌԴ ՊՆ Գլխավոր հետախուզական վարչության կիբեռհարձակումների թիրախների ամբողջական ցանկը՝ Ուկրաինայի պետական ​​ընկերություններից մինչև Եվրոպայի ենթակառուցվածքային կառույցներ, Կատարի բանկ և աշխարհի տարբեր բժշկական կլինիկաներ: Հաքերների զանգերը, թռիչքները և նամակագրությունն ուսումնասիրելով՝ The Insider-ը նույնականացրել է խմբի մի քանի տասնյակ անդամների, այդ թվում՝ դատապարտված հաքերների, նորավարտ ուսանողների:

Այդ գործողությունների ընթացքում բացահայտվել են հարձակումներ տարբեր երկրների պետական կառույցների վրա՝ այդ թվում հայաստանյան։

Մասնավորապես, ըստ ներկայացված ցանկի, թիրախավորվել են ՀՀ ԱԳՆ կայքը՝ 2022 թվականի նոյեմբերի 13-ին ժամը 22։51-ին, ՀՀ Առողջապահության նախարարության կայքը՝ 2023թ․ մայիսի 13-ին ժամը 21։40-ին, ԱԳՆ կայքը՝ 2023թ-ի մարտի 25-ին ժամը 01:45-ին և դարձյալ ԱԳՆ կայքը՝ 2024թ․ փետրվարի 2-ին ժամը 14։53-ին։

«Ոնց հասկանում ենք էլեկտրոնային փոստերի վրա են եղել հարձակումները։ Դա հիմնականում այն ժամանակաշրջանն է, երբ Արցախը շրջափակման մեջ էր և օրինակ, Առողջապահության նախարարության տվյալներով կարելի էր տպավորություն ստեղծել, թե ինչ վիճակում է բնակչությունը»,- նշում է Մարտիրոսյանը։

Մեդիափորձագետի դիտարկմամբ՝ նմանատիպ բացահայտումներից հետո ՀՀ պետական կառույցները միշտ լուռ են և ոչինչ չեն մեկնաբանում։

«Մենք ունենք բազմաթիվ զեկույցներ Հայաստանի վրա հարձակումների մասին, բայց այդ զեկույցները, ոնց որ այս դեպքում, երրորդ կողմը ինչ-որ փաստաթղթեր ուսումնասիրելիս հայտնաբերում է նաև ՀՀ-ի դեմ հարձակումներ։ Բայց մեզ մոտ տպավորություն է, թե ոչինչ չի եղել»,- ասում է Սամվել Մարտիրոսյանը։

Անի Թամրազյան