06.10.2026 | 22:54
Հայաստանի մի շարք հասցեներում էլեկտրաէներգիայի անջատումներ կլինեն
Պետական բյուջեից 84 մլն դրամ կհատկացվի ԱՆԻՖ-ին` 2024-ի շահութահարկը վճարելու համար
Քաղաքականություն
22.05.2025 | 13:50
ՀՀ պետական բյուջեից 84 մլն 473 հազար 633 դրամ կհատկացվի չգործող ԱՆԻՖ-ին՝ 2024-ի շահութահարկը վճարելու համար։ Դա վճարելու վերջնաժամկետը 2025 թվականի ապրիլի 20-նն էր։ Որոշման այս նախագիծը կառավարության այսօրվա նիստի օրակարագում էր՝ չզեկուցվող ընթացակարգով։
Նախագծում նշված է, որ ընկերությունը պետք է լուծարվեր 2024 թվականի ընթացքում, բայց լուծարման հանձնաժողովը դեռևս չի ձևավորվել ՀՀ կառավարության սահմանված աշխատանքների չիրականացման պատճառով։ Այսինքն՝ այն պետք է լուծարվեր շահութահարկի վճարման ժամկետից առաջ։
Նախագծի հիմնավորման մեջ նշվում է, որ ԱՆԻՖ-ին տրամադրված 1.7 միլիարդ դրամ դրամաշնորհի կազմում 2024 թվականի շահութահարկի գումարը չի ներառվել, քանի որ այն ի սկզբանե չի կանխատեսվել որպես ծախս և, հետևաբար, չի արտացոլվել նաև ընկերության տնօրենների խորհրդի կողմից հաստատված ծախսային նախահաշվում։
Դրամաշնորհի հատկացումը կիրականացվի առանց մրցույթի։ Նախագծի հեղինակ Պետգույքի կառավարման կոմիտեն սա բացատրում է նրանով, որ դրամաշնորհը նախատեսված է ուղղել միայն մեկ նպատակով՝ ընկերության շահութահարկի պարտավորության մարմանը։ Այսինքն՝ ստացվում է, որ ԱՆԻՖ-ը ունի շահութահարկի վճարման պարտավորություն, սակայն չունի որևէ միջոց դա կատարելու համար։
ԱՆԻՖ-ը ստեղծվել է 2019 թվականին․ նպատակը հստակ էր՝ երկրի տնտեսության մեջ ներգրավել օտարերկրյա մեծ ներդրումներ, խթանել խոշոր նախագծեր և զարգացնել ենթակառուցվածքներ: 2022-2023 թվականներին կոռուպցիայի կանխարգելման հանձնաժողովը և ՀՀ պետական վերահսկողական ծառայությունը բացահայտել են հիմնադրամում չարաշահումների և հափշտակությունների դեպքեր:
2025 թվականի ապրիլին ՀՀ գլխավոր դատախազությունը հայտնեց, որ ԱՆԻՖ-ում ենթադրյալ չարաշահումների վերաբերյալ քրեական գործ կա հարուցված, որի նախաքննությունն ընթանում է ՀՀ քննչական կոմիտեի հատուկ հանձնարարություններով գործերի քննության վարչությունում։ Այդ քրգործը հարուցվել է Պետական վերահսկողական ծառայության կատարած ուսումնասիրությունից հետո: Այս պահին, սակայն, գործով որևէ մեղադրյալ չկա։
Վերջերս էլ Գլխավոր դատախազ Աննա Վարդապետյանը խորհրդարանում, ի պատասխան Ալեն Սիմոնյանի հարցի, տեղեկացրեց, որ ԱՆԻՖ-ի գործով այժմ ակտիվ նախաքննության փուլում են։ Գլխավոր դատախազը չէր բացառել, որ կարճ ժամանակ անց հնարավոր է՝ քրեական հետապնդումներ հարուցվեն։
ԱՆԻՖ-ի հիմնադրման պահից մինչև 2023 թվականի հոկտեմբեր ընկերության տնօրենների խորհրդի նախագահը եղել է Տիգրան Ավինյանը։ Անդրադառնալով քրեական գործին, Ավինյանը մեկուկես ամիս առաջ նշել էր, որ իր հետ կապված իրավական գործընթաց չկա և չի կարող լինել։
Արփի Հակոբյան
