Զելենսկին պատժամիջոցներ է սահմանել Ալեքսեյ Արեստովիչի նկատմամբ

Ուկրաինայի նախագահ Վլադիմիր Զելենսկին ուժի մեջ է հայտարարել Ազգային անվտանգության և պաշտպանության խորհրդի կողմից պատժամիջոցներ սահմանելու որոշումը։ Այս մասին հաղորդվել է նախագահի աշխատակազմի կայքում, փոխանցում է Current time-ը։

Պատժամիջոցների ցանկում ներառված են 15 ֆիզիկական և 36 իրավաբանական անձինք։ Նրանց թվում են՝ բլոգեր Միրոսլավ Օլեշկոն, Ուկրաինայի նախագահի գրասենյակի նախկին խորհրդական Ալեքսեյ Արեստովիչը և քաղաքագետ Կոնստանտին Բոնդարենկոն, որը գրել է Զելենսկիի կենսագրությունը՝ «Ջոկեր» վերնագրով։

Արեստովիչը լայն ճանաչում էր ձեռք բերել ռուսական լայնածավալ ներխուժման մեկնարկից հետո՝ աշխատելով որպես նախագահի աշխատակազմի խորհրդական։ Նա հրաժարական է տվել 2023 թվականի հունվարին, այն բանից հետո, երբ բլոգեր Մարկ Ֆեյգինի հետ զրույցում հայտարարել էր, որ Դնեպրում բնակելի շենքին հարվածած ռուսական հրթիռը, որի հետևանքով 44 մարդ էր զոհվել, ենթադրաբար, խոցվել է Ուկրաինայի ՀՕՊ ուժերի կողմից։ Ուկրաինայի Պաշտպանության նախարարության ներկայացուցիչները հերքել էին այս տեղեկատվությունը։

Ուկրաինայում Արեստովիչի դեմ հարուցվել է երկու քրեական գործ՝ բռնության և ազգային անհանդուրժողականության պաշտամունքը խթանող աշխատանքների ստեղծման և տարածման համար (Քրեական օրենսգրքի 300-րդ հոդված), ինչպես նաև քրեական հանցագործության մասին գիտակցաբար կեղծ հաղորդում տալու համար (Քրեական օրենսգրքի 383-րդ հոդվածի 1-ին մաս):

Ներկայում Արեստովիչն արտերկրում է։

Թարգմանությունը՝ Էմմա Չոբանյանի