Ֆրանսիայում պոետները երբեք չեն մահանում. Էմանուել Մակրոնի հրաժեշտի խոսքը՝ Շառլ Ազնավուրի հոգեհանգստին

Ազնավուրն ուզում էր մեկ դար ապրել, նա խոստացել էր, բայց մահն ավելի շուտ վրա հասավ: Աշխարհահռչակ շանսոնյե Շառլ Ազնավուրին մատուցված ազգային տուրքի արարողության ժամանակ ունեցած ելույթում ասել է Ֆրանսիայի նախագահ Էմանուել Մակրոնը:

Ֆրանսիայի նախագահի խոսքով՝ տարիքն Ազնավուրին չէր զրկել ապրելու, ստեղծագործելու, երգելու, սիրելու և ծիծաղելու խենթ ախորժակից. «Նա նաև մեզ էր ապրեցնում՝ ամոքելով մեր հույզերն ու զգացմունքները…»:

«Բոլոր առաքինություններից նա կարևորում էր հավատարմությունը. հավատարմությունն իր ծնողներին, կնոջը՝ Ուլային, իր երեխաներին, հազարավոր ընկերներին: Նաև հավատարմությունը Հայաստանին: Նա Հայաստանի ընկերն էր, դեսպանը, բայց նաև որդին, որը վերադարձավ, երբ տեղի ունեցավ 1988-ի երկրաշարժը»,- նշել է Էմանուել Մակրոնը:

Ֆրանսիայի նախագահը գնահատանքի խոսքեր է հնչեցրել Ազնավուրի մասին՝ որպես ֆրանսիացու, հայի, հայ-ֆրանսիական բարեկամության կամրջի, հրաշալի բանաստեղծի ու փիլիսոփայի:

«Նա ընդմիշտ կմնա մեզ հետ, որովհետև Ֆրանսիայում պոետները երբեք չեն մահանում»,- հավելել է Էմանուել Մակրոնը:

Նշենք, որ Շառլ Ազնավուրի հոգեհանգստի արարողությանը ներկա են ՀՀ վարչապետ Նիկոլ Փաշինյանը, ՀՀ նախագահ Արմեն Սարգսյանը, Ամենայն Հայոց Գարեգին 2-րդ կաթողիկոսը, ԱԳ և մշակույթի նախարարները: Էմանուել Մակրոնից բացի՝ արարաղությանը ներկա են նաև Ֆրանսիայի նախկին նախագահներ Ֆրանսուա Օլանդն ու Նիկոլա Սարկոզին, այդ երկրի բարձրաստիճան պաշտոնյաներ:

Շառլ Ազնավուրին վերջին հրաժեշտի արարողությունը տեղի կունենա վաղը՝ հոկտեմբերի 6-ին, Փարիզի Սուրբ Հովհաննես Մկրտիչ եկեղեցում:

Հավելենք, որ հոկտեմբերի 6-ին Հայաստանում և Արցախում սգո օր է հայտարարված: