Քաղաքականություն
21.04.2025 | 11:33
Առավոտից տեղեկություններ են տարածվում, որ այս գիշեր ևս մոտ մեկ ժամ անդադար կրակոցներ են լսվել Սյունիքի մարզի Խնածախ գյուղում։ Factor.am-ի հետ զրույցում Տեղի համայնքապետ Դավիթ Ղուլունցն ուղիղ չպատասխանեց՝ կրակոցներ եղե՞լ են գյուղի ուղղությամբ.
«Ես բան չեմ ասում, եկեք ինքներդ մեկ օր մնացեք ու կտեսնեք, միայն զանգել հարցնելով չի»։
Մեր այն դիտարկմանը, որ նման դեպքերը պետք է հանրայնացվեն, քանի որ զուգահեռ ադրբեջանական կողմի հետ քննարկվում է խաղաղության համաձայնագիրը, Ղուլունցը պատասխանեց.
«Էլի եմ ասում՝ եկեք ինքներդ տեսեք։ Որ իմանաք՝ ի՞նչ եք անելու, դիտորդների թի՞վն եք ավելացնելու»։
Factor․am-ը փորձեց կապ հաստատել նաև Պաշտպանության նախարարության հետ, սակայն մեր զանգերն ու նամակներն անպատասխան մնացին։
Նշենք, որ հակառակորդը տևական ժամանակ է կրակոցներ է արձակում Սյունիքի մարզի տարբեր բնակավայրերի ուղղությամբ։
Հիշեցնենք, որ օրեր առաջ Ադրբեջանի ԶՈՒ ստորաբաժանումները կրակ էին բացել Սյունիքի մարզի Խնածախ բնակավայրի ուղղությամբ, ինչի հետևանքով վնասվել էր գյուղի մշակույթի տունը։
Ռոզա Վարդանյան
