ԱԱԾ փոխտնօրեն Անդրանիկ Սիմոնյանը պետք է ցուցմունք տա Ռուբեն Վարդազարյանի գործով. դռնբաց նիստին փորձում էին խոչընդոտել Factor TV-ի մուտքը․ ՏԵՍԱՆՅՈՒԹ

Բարձրագույն դատական խորհրդի նախկին նախագահ Ռուբեն Վարդազարյանի գործով դատական նիստին այսօր պետք է ցուցմունք տա ԱԱԾ փոխտնօրեն Անդրանիկ Սիմոնյանը, որը նախկինում դատավոր է եղել:

Վարդազարյանի վերաբերյալ վարույթը հարուցվել է Անդրանիկ Սիմոնյանի հաղորդման հիման վրա:

Վերջինս 2021 թվականին հայտնել է, որ եղել է Լոռու մարզի ընդհանուր իրավասության դատարանի դատավոր, երբ ԲԴԽ նախագահ Ռուբեն Վարդազարյանը զանգահարել է իրեն և խնդրել, հորդորել «Ալավերդցի Վահագն» անունով հայտնի Վահագն Աբգարյանի նկատմամբ կալանավորման հետ չկապված խափանման միջոց ընտրվի:

Անդրանիկ Սիմոնյանը մի քանի անգամ հրավիրվել է դատական նիստին, սակայն վերջինս, պարտավորված լինելով ներկայանալ դատարանի կանչով, չի եկել: Դատարանը արձանագրային որոշում է կայացրել այն մասին, որ առկա է վկային հարցաքննելու անհնարինություն և հրապարակել Սիմոնյանի նախաքննական ցուցմունքը:

Դատավոր Վահե Դոլմազյանը հեռացել է խորհրդակցական սենյակ՝ դատական ակտ կայացնելու, սակայն խորհրդակցական սենյակում որոշել է վերսկսել գործի քննությունը՝ ի թիվս այլնի այն հիմնավորմամբ, որ անհրաժեշտություն կա Անդրանիկ Սիմոնյանին հարցաքննելու:
Այսպիսով՝ Սիմոնյանը կրկին կանչվել է դատարան ու այսօր պետք է ցուցմունք տար:

Այսօր, ամենայն հավանականությամբ, Սիմոնյանի դատարան գալու հանգամանքով պայմանավորված, դատարանում ուժեղացված ծառայություն է իրականացվում:

Երբ Factor TV-ի լրագրողը մուտք գործեց նիստերի դահլիճ, կարգադրիչները խնդրեցին առայժմ դատարանի միջանցքում սպասել, իսկ հետո փորձում էին այլևս չթույլատրել Factor TV-ի օպերատորի և լրագրողի մուտքը դահլիճ:

Մինչդեռ Դատական իշխանության պաշտոնական՝ court.am կայքում առկա է Վարդազարյանի գործի վերաբերյալ տեղեկություն այն մասին, որ նիստը դռնբաց է: Կարգադրիչները որևէ պարզաբանում չտվեցին այն մասին, թե ինչու չի թույլատրվում ներկա գտնվել նիստին, որից հետո փորձեցինք կապ հաստատել նաև Հակակոռուպցիոն դատարանի խոսնակի հետ:

Շուտով ստացանք պատասխան այն մասին, որ նիստը դեռևս չի սկսվել, մինչդեռ նիստը սկսված էր: Ստիպված եղանք չենթարկվել կարգադրիչի պահանջին ու մուտք գործել դահլիճ դատավորից պարզաբանումներ պահանջելու համար, թե ինչու է խոչընդոտվում մեր աշխատանքը:
Ինչպես պարզվեց, դահլիճում արդեն իսկ վարույթի մասնակից չհանդիսացող անձ կար՝ Ռուբեն Վարդազարյանի որդին:
Երբ դատավորին հարց ուղղեցինք՝ արդյոք նիստը դռնփակ դարձնելու որոշում կա, եթե ոչ, ապա ինչո՞ւ են կարգադրիչները խոչընդոտում մեր աշխատանքը, դատավորը որևէ պարզաբանում չտվեց, բայց և չարգելեց ներկա գտնվել դահլիճում և կատարել մեր աշխատանքը:

Տեղեկացանք նաև, որ Անդրանիկ Սիմոնյանը հայտնել է , որ 15 րոպե ուշացած է ներկայանալու, սակայն Վարդազարյանի պաշտպաններից Արամ Օրբելյանը դատավորին ինքնաբացարկ հայտնեց, դատավորը հեռացավ խորհրդակցական սենյակ՝ որոշում կայացնելու,ուստի Սիմոնյանը դեռևս չի հարցաքննվել:

Արաքս Մամուլյան