ՊԵԿ-ը խոշոր հարկատուների է տուգանել․ որ ընկերություններն են դրանք

Պետական եկամուտների կոմիտեն հրապարակել է այն ընկերությունների ցանկը, որոնց մոտ արձանագրվել են աշխատողի չձևակերպման և ՀԴՄ կիրառման կանոնների խախտման դեպքեր։ Հարկային ստուգումներն իրականացվել են 2025 թ․ հունվարի 1-ից մարտի 31-ը ներառյալ։

34 խոշոր հարկ վճարողների մոտ արձանագրվել է ՀԴՄ-ի կիրառման կանոնների խախտում և առաջադրվել է շուրջ 138.1 մլն դրամ տուգանք։ Տուգանված հարկատուների շարքը գլխավորում է «Էվրիկա գրուպ» ընկերությունը, այն տուգանվել է 20 մլն դրամով։ Հարկ է նշել, որ ընկերությունը նույնքան տուգանվել էր նաև նախորդ տարի։ Factor.am-ը իրավաբաների պետական ռեգիստրից տեղեկանում է, որ ընկերությունը 100% բաժնետերը Թեմուր Ուսուբովն է։

10 մլն դրամով տուգանվել է Բարսեղ Բեգլարյանին պատկանող «Ֆլեշ» ՍՊԸ-ն է։ Այն ավտոմոբիլային բենզինի, դիզելային վառելիքի և հեղուկացված ածխաջրածնային գազի ներկրմամբ և վաճառքով զբաղվող ընկերություն է։ Տարեսկզբին Շուկայի վերահսկողության տեսչական մարմինն էլ 37 միլիոն 796 993 դրամ տուգանք էր նշանակել «Ֆլեշ» ՍՊԸ-ի նկատմամբ։ 

Նույնքան տուգանվել է նաև «Գազ-պրոպան» ընկերությունը։ Ընկերության հիմնադիրը Պերճ Յախանեջյանն է։ Երևանում և ՀՀ մարզերում հեղուկացված ածխաջրածնային գազի գործունեությամբ զբաղվող ընկերության նկատմամբ Շուկայի վերահսկողության տեսչական մարմինն այս տարի 15 միլիոն 964 հազար դրամ տուգանք է նշանակել։ 

ՊԵԿ ստուգումների արդյունքում 6 խոշոր հարկ վճարողների մոտ արձանագրվել է 31 չգրանցված աշխատող և առաջադրվել է շուրջ 7.8 մլն դրամ տուգանք։ Տուգանված հարկատուների ցանկը գլխավորում է «Մեղրաձոր գոլդ» ընկերությունը։ Ընկերությունում ՊԵԿ-ն արձանագրել է 20 չգրանցված աշխատող,  արդյունքում ընկերությանը տուգանել է 5 մլն դրամով։ 

Այս ընկերության 33 %-ի բաժնետերը Ծաղկաձորում գտնվող նախկին «Գոլդեն փելիս» հյուրանոցի սեփականատեր, գործարար Նարեկ Նալբանդյանն է։ Նա ընկերությունում բաժնեմաս է ստացել նախորդ տարվա հոկտեմբերին։ Ընկերությունում 33 %-ի բաժնեմաս ունի նաև Արտեմ Սահակյանը, իսկ 34 %-ի բաժնետերը Նարեկ Մարգարյանն է։ 

Անի Թամրազյան