13.05.2025 | 00:24
Ուժգին քամու ժամանակ թիթեղը պոկվել և հարվածել է հղի կնոջը․ երեխան ծնվել է ճակատի շրջանում խոր վնասվածքով
Առանց սեթևեթանքների ասում եմ՝ ինֆորմացիա չունեմ․ Զեյնալյանը՝ «Գրիգոր Լուսավորիչ բժշկական կենտրոն»-ի տնօրեն նշանակվելու լուրերի մասին
Հասարակություն
02.04.2025 | 15:10
Առողջապահության նախարարությունը չի մեկնաբանում մամուլում շրջանառվող լուրերը, թե «Սուրբ Գրիգոր Լուսավորիչ բժշկական կենտրոն»-ի տնօրեն Արման Հովակիմյանը և Վ․ Ֆանարջյանի անվան ուռուցքաբանության ազգային կենտրոնի տնօրեն Նարեկ Մանուկյանը ազատման դիմումներ են գրել։
Առողջապահության նախարարի մամուլի խոսնակ Մարիամ Ծատրյանը Factor.am-ի հետ զրույցում նշեց, որ այս պահին հարցը չեն մեկնաբանում։
Ըստ մամուլի հրապարակումների՝ երկու բժշկական կենտրոնների տնօրեններին հրավիրել են նախարարություն և հորդորել ազատման դիմումներ գրել։
Մեզ չհաջողվեց կապ հաստատել Արման Հովակիմյանի և Նարեկ Մանուկյանի հետ։
Մինչ նախարարությունից երկու բժշկական կենտրոնների տնօրենների ազատման մասին լուրերը չեն մեկնաբանում, տևական ժամանակ է՝ լուրեր են շրջանառվում, որ ՔՊ նախկին պատգամավոր, ԱԺ առողջապահության մշտական հանձնաժողովի նախկին նախագահ Նարեկ Զեյնալյանը նշանակվելու է «Սուրբ Գրիգոր Լուսավորիչ» բժշկական կենտրոն։
Իշխող ուժից հեռացած Նարեկ Զեյնալյանը Factor.am-ի հետ զրույցում ո՛չ հերքեց, ո՛չ հաստատեց իր՝ «Սուրբ Գրիգոր Լուսավորիչ» բժշկական կենտրոնի տնօրեն նշանակվելու մասին տեղեկությունները։
«Առանց սեթևեթանքների ասում եմ՝ ես այս պահին ինֆորմացիա չունեմ։ Ավելացնելու ոչինչ չունեմ»,- կարճ արձագանքեց նա։
Հիշեցնենք՝ ԱԺ-ում ՔԿ նախկին նախագահ Արգիշտի Քյարամյանի և պատգամավոր Հովիկ Աղազարյանի միջև տեղի ունեցած աղմկահարույց միջադեպից հետո Նիկոլ Փաշինյանը Հանրային հեռուստաընկերությանը տված հարցազրույցում հայտարարել էր, որ խնդրանքով դիմել է Հովիկ Աղազարյանին և Նարեկ Զեյնալյանին՝ վայր դնելու մանդատները։ Փաշինյանի հայտարարությունից հետո Նարեկ Զեյնալյանը վայր դրեց մանդատը։ Տարածած հայտարարությունում Նարեկ Զեյնալյանը ընդգծել էր՝ գիտելիքները և փորձը շարունակելու է ծառայեցնել ՀՀ-ին։
Մանյա Պողոսյան
