06.10.2026 | 16:53
Գերմանիայի հետախուզական ծառայության նախկին ղեկավարը ձերբակալվել է լրտեսության կասկածանքով
Երևանի և Բաքվի միջև խաղաղության համաձայնագիրը բեկումնային կլինի. Արարատ Միրզոյան
Քաղաքականություն
27.03.2025 | 12:50
Երևանի և Բաքվի միջև խաղաղության պայմանագիրը բեկումնային կլինի։ Այս մասին Աստանայում հայտարարել է Հայաստանի ԱԳ նախարար Արարատ Միրզոյանը։
Նա նշել է, որ երկարատև բանակցություններից հետո ժամանակն է ստորագրել համաձայնագիրը և առաջ շարժվել Հարավային Կովկասում խաղաղության հասնելու և տնտեսական հնարավորությունները բացելու համար։
Նշվում է, որ Արարատ Միրզոյանը Ղազախստանի ԱԳ նախարար Մուրատ Նուրտլեուի հետ կարևոր տարածաշրջանային հարցեր է քննարկել։ Նա ներկայացրել է Հայաստանի և Ադրբեջանի միջև հարաբերությունների կարգավորման վերջին զարգացումները, ներառյալ՝ Հայաստանի և Ադրբեջանի միջև խաղաղության հաստատման մասին համաձայնագրի նախագծի համաձայնեցումը, կայուն խաղաղության հասնելու՝ Հայաստանի առաջարկները։
«Հայաստանի դիրքորոշումը հստակ է՝ երկու պետությունների տարածքային ամբողջականության ճանաչում և սահմանազատման գործընթացը՝ հիմնված Ալմաթիի հռչակագրի դրույթների վրա»,- ընդգծել է Հայաստանի ԱԳՆ ղեկավարը՝ նշելով, որ Երևանը բարձր է գնահատում Ղազախստանի ԱԳՆ հայտարարությունը Հայաստանի և Ադրբեջանի միջև խաղաղության համաձայնագրի շուրջ բանակցությունների ավարտի կապակցությամբ։
Նա նաև հիշեցրել է, որ Ղազախստանն իր հարթակն է տրամադրել հայ-ադրբեջանական բանակցությունների համար։
«Վստահ եմ, որ համատեղ ջանքերով մենք կկարողանանք է՛լ ավելի զարգացնել և ամրապնդել երկկողմ հարաբերությունները, որոնք ունեն ռազմավարական ուղղվածություն: Մեր փոխայցելությունները և ակտիվ շփումներն ամուր հիմք են ստեղծում մեր գործընկերության համար: Ուստի, ուրախ եմ ձեզ հրավիրել Հայաստան՝ ձեզ հարմար պահին»,- նշել է Միրզոյանը։
Մուրատ Նուրտլեուն իր հերթին նշել է, որ Աստանան և Երևանը համանման տեսակետներ ունեն համաշխարհային օրակարգի բազմաթիվ հարցերի շուրջ։
«Մենք մեծ նշանակություն ենք տալիս նաև Հարավային Կովկասում անվտանգության և խաղաղության ապահովմանը»,- ասել է նա։
Հանդիպմանը հայտարարվել է, որ Հայաստանը շահագրգռված է «Խորգոսում» խանութների ցանց բացելու հարցում, իսկ հայ գործարարները նախատեսում են նաև առևտրի տաղավարներ կազմակերպել Ղազախստանի մարզերում։ 2025 թվականին էլ «Թումո» կենտրոնի մասնաճյուղը կբացվի Ղազախստանում։ Իր հերթին, Ղազախստանը պատրաստ է ապագայում կրթաթոշակներ տրամադրել Հայաստանից բակալավրիատի և մագիստրատուրայի ուսանողների համար։
Հանդիպմանը հիշեցվել է նաև, որ ապրիլին Հայաստանում կանցկացվեն Ղազախստանի օրեր։ Ղազախստանում ՀՀ մշակույթի օրերը տեղի են ունեցել 2024 թվականի հոկտեմբերին։
Թարգմանությունը՝ Էմմա Չոբանյանի
