«Ինչո՞ւ Factor TV-ին չեք թույլատրում լուսաբանել մրցույթները», «Մենք չենք որոշում». քաղաքապետի խոսնակ. ՏԵՍԱՆՅՈՒԹ

Այդքան խոսում եք բաց ու թափանցիկ աշխատանքի մասին, ինչո՞ւ Factor TV-ին երկու անգամ չեք թույլատրել լուսաբանել վարչության պետերի մրցույթները․ այսօր այս հարցն ուղղեցինք Երևանի քաղաքապետի մամուլի քարտուղար Հայկ Կոստանյանին։

«Factor TV-ի լուսաբանում չթույլատրելը ո՛չ Հայկ Կոստանյանն է արգելում, ոչ լրատվության վարչության նախկին պետ Տարոն Գևորգյանը։ Կա ձևաչափ, նիստի անդամներ, և այդ նիստի անդամներն են նպատակարահարմար համարում՝ այս կամ այն քննության ժամանակ ԶԼՄ-ներին ընդունել, որպեսզի լուսաբանեն, թե ոչ։ Դրա որոշողը փաստացի հանձնաժողովի անդամներն են»,- մանրամասնեց Կոստանյանը։
Factor TV-ի լրագրողը հավելեց, որ խնդիրը հենց հանձնաժողովների անդամների կողմ չլինելն է։
Հիշեցնենք՝ քաղաքապետարանը Factor TV-ն երկու անգամ արգելել է լուսաբանել համայնքային ծառայության թափուր պաշտոնների համալրման համար կազմակերպված մրցույթը։ Մեր հարցմանը գրավոր պատասխանել էին, թե լուսաբանումը կարող է կաշկանդել մրցույթի մասնակիցներին։
«Մրցութային հանձնաժողովը մրցույթի մասնակիցներին չկաշկանդելու, անհարգի (անհարկի/խմբ.) լարվածության մթնոլորտ չստեղծելու նպատակով՝ որոշում է չթույլատրել Factor TV լրատվական միջոցին ներկա գտնվելու Երևանի քաղաքապետարանի աշխատակազմի ճարտարապետության և քաղաքաշինության վարչության քաղաքաշինական փաստաթղթերի ձևակերպման տարածքային առաջին բաժնի պետի համայնքային ծառայության թափուր պաշտոնն զբաղեցնելու համար հայտարարված մրցույթին»,- ասված էր քաղաքապետարանից ստացած նամակում։

Մանրամասները՝ տեսանյութում։

Արփի Հակոբյան