ՆԳՆ-ն դիտարկումներ է ներկայացրել Երևանի քաղաքապետարանի նախագծի վերաբերյալ

Ներքին գործերի նախարարությունը ստացել է «Երևան քաղաքում տեղական ինքնակառավարման մասին» օրենքում և հարակից օրենքներում փոփոխություններ կատարելու նախագծերը։ Այս մասին Factor.am-ի գրավոր հարցմանն ի պատասխան հայտնել են նախարարությունից։

Խոսքը վերաբերում է Ավինյանի նախաձեռնությանը, որի համաձայն ճանապարհատրանսպորտային պատահարների դեպքում վարորդները պետք է պատասխանատվության ենթարկվեն, եթե 15 րոպեի ընթացքում վթարված մեքենաները դուրս չեն բերում փողոցի երթևեկելի հատվածից։

«ՆԳՆ-ն ՀՀ տարածքային կառավարման և ենթակառուցվածքների նախարարությունից ստացված և Երևանի քաղաքապետարանի կողմից լրամշակված «Երևան քաղաքում տեղական ինքնակառավարման մասին» օրենքում փոփոխություն կատարելու մասին» և հարակից օրենքներում փոփոխություններ և լրացումներ կատարելու մասին» օրենքների նախագծերի փաթեթի վերաբերյալ սահմանված ժամկետում տրամադրել է գերատեսչության կարծիքը»,- նշված է պատասխանում։

Ներքին գործերի նախարարությունը դիտարկումներ է ներկայացրել նախագծի վերաբերյալ։

«Տրամադրված կարծիքի շրջանակներում նախարարությունը ներկայացրել է որոշ դիտարկումներ նախագծով առաջարկվող դրույթների պրակտիկ իրացման հետ կապված։

Ինչպես արվում է ցանկացած շրջանառվող նախագծի դեպքում, այս դեպքում ևս կարծիքների ամփոփման փուլում առաջիկայում նախաձեռնվելու է քննարկում, որի շրջանակներում գործընկերների հետ կդիտարկվեն հնարավոր կոնսենսուսային լուծումները»,- ասված է ՆԳՆ-ից ստացված պատասխանում։

Հիշեցնենք՝ Երևանի քաղաքապետ Տիգրան Ավինյանը փետրվարի 20-24-ի ձյան առատ տեղումներից հետո գործակարգավարական նիստի ժամանակ, փորձելով բացատրել մայրաքաղաքում երթևեկության կաթվածահար վիճակը, ասել էր, որ խցանումների 80 տոկոսը ամառային անվադողերով ավտոմեքենաների ԱՊՊԱ-ների հետևանքով էր։ Ավինյանին շտապել էր հերքել Ներքին գործերի նախարարությունը։ Գերատեսչության մամուլի քարտուղար Նարեկ Սարգսյանը Factor TV-ի հարցին ի պատասխան հայտնել էր, որ փետրվարի 20-ից 24-ը՝ մինչև ժամը 08։00-ը, Երևանում արձանագրվել է ճանապարհատրանսպորտային 482 պատահար, որոնցից միայն 1 տրանսպորտային միջոց է եղել ամառային անվադողերով, իսկ 8 մեքենա՝ ձմեռային մաշված անվադողերով։ Իսկ Հայաստանի ապահովագրողների բյուրոյի գործադիր տնօրեն Վաղինակ Եղիազարյանը Factor TV-ին հայտնել էր, որ փետրվարի 20-24-ը գրանցվել է 942 պատահար, որից շուրջ 500-ը փաստագրել են պարեկային ծառայողները։ Սակայն ԱՊՊԱ-ի տվյալների բազայում չի նշվում՝ վթարված տրանսպորտային միջոցներն ամառայի՞ն, թե՞ ձմեռային անվադողերով են:

Արփի Հակոբյան