07.02.2026 | 00:13
Հայաստանի պատվիրակությունը՝ ձմեռային Օլիմպիական խաղերի բացմանը․ ՏԵՍԱՆՅՈՒԹ, ԼՈՒՍԱՆԿԱՐՆԵՐ
ՆԱՏՕ-ի գլխավոր քարտուղարը ԵՄ-ին ու Թուրքիային կոչ է անում խորացնել հարաբերությունները
Քաղաքականություն
11.03.2025 | 23:29
ՆԱՏՕ-ն կոչ է անում ԵՄ-ին ու Թուրքիային ամրապնդել հարաբերությունները, քանի որ ԱՄՆ նախագահ Դոնալդ Թրամփի դուրս գալը եվրոպական անվտանգության ուժերից Եվրոպայի մայրաքաղաքներին ստիպել է վերանայել իրենց դաշինքները:
ՆԱՏՕ-ի գլխավոր քարտուղար Մարկ Ռյուտեն փակ դռների հետևում կոչ է արել ԵՄ առաջնորդներին ավելի շատ համագործակցել Թուրքիայի նախագահ Ռեջեփ Թայիփ Էրդողանի հետ երկար տարիների լարված հարաբերություններից հետո։ Այս մասին հայտնում է Financial Times-ը, որին վկայակոչում է Turkiye today-ը:
Ավելի սերտ համագործակցության այս կոչը հնչում է այն ժամանակ, երբ Բրյուսելը ուղիներ է փնտրում ավելի սերտ համագործակցելու Թուրքիայի և այլ ոչ ԵՄ հարևանների հետ՝ որպես եվրոպական պաշտպանական կարողությունները բարձրացնելու հավակնոտ ջանքերի մի մաս:
Մարտի սկզբին էլ Թուրքիայի ԱԳ նախարար Հաքան Ֆիդանը Լոնդոնում մասնակցել էր Եվրոպայի խոշոր ռազմական տերությունների հանդիպմանը՝ քննարկելու Ուկրաինային աջակցությունը և ավելի լայն պաշտպանական խնդիրները:
Փետրվարին Ռյուտեն ԵՄ առաջնորդների հետ առանձնազրույցի ժամանակ խնդրանքով հանդես էր եկել՝ կոչ անելով նրանց զարգացնել համագործակցությունը Թուրքիայի հետ։ Այս մասին ասել են Financial Times-ի զրույցին ծանոթ երեք աղբյուրները։
Նիդերլանդների նախկին վարչապետ Ռյուտեն հրաժարվել է մեկնաբանություններ տալ իր խոսնակի միջոցով: ԵՄ բարձրաստիճան պաշտոնյաներից մեկը մեկնաբանել է. «Ժամանակի որոշակի պահին դուք պետք է որոշեք, թե ում եք ուզում ձեր թիմում՝ անկախ ձեր ունեցած ցանկացած խնդրից: Սակայն Թուրքիան նաև պետք է հստակեցնի իր դիրքորոշումը Ռուսաստանի նկատմամբ»:
Թուրքիան չի միացել արևմտյան դաշնակիցներին Մոսկվայի դեմ պատժամիջոցներ կիրառելու հարցում՝ ի պատասխան նրա Ուկրաինա ներխուժման։ Այն շարունակել է ամուր տնտեսական և էներգետիկ կապեր պահպանել Ռուսաստանի հետ՝ միաժամանակ առանցքային հարաբերություններ պահպանելով Ուկրաինայի հետ և կոչ անելով պահպանել իր տարածքային ամբողջականությունը։
Թուրքիայի հզոր պաշտպանական արդյունաբերությունը ԵՄ-ում ավելի լայն բանավեճի կենտրոնում է այն հարցի շուրջ, թե արդյոք երրորդ երկրների պաշտպանական ընկերությունները պետք է օգուտ քաղեն զենքի վրա ծախսերը մեծացնելու ԵՄ նախաձեռնություններից: Անկարայի հետ ներգրավվածությունը խորացնելու ջանքերը նաև նպատակ ունեն բարելավելու Թուրքիայի և ԵՄ մայրաքաղաքների միջև երկկողմ կապերը։ Վերջին մի քանի ամիսների ընթացքում Թուրքիայի պաշտպանական արդյունաբերությունը բազմաթիվ պաշտպանական համագործակցության համաձայնագրեր է ստորագրել ինչպես Իսպանիայի, այնպես էլ Իտալիայի հետ։
Չնայած Թուրքիան դեռևս պաշտոնապես ԵՄ անդամակցության թեկնածու է՝ գործընթացը մի քանի տարի փակուղում է, քանի որ երկխոսության տարբեր ուղիները, ՝ անվտանգության ու պաշտպանության, մասամբ դադարեցվել են Հունաստանի հետ չկարգավորված լարվածության պատճառով:
Թարգմանությունը՝ Էմմա Չոբանյանի
