20.02.2026 | 02:07
Ադելիա Պետրոսյանը մեդալ չնվաճեց ձմեռային Օլիմպիական խաղերում
Պուտինը համաձայնել է օգնել Թրամփին՝ միջնորդ լինել Իրանի միջուկային բանակցություններում․Bloomberg
Քաղաքականություն
04.03.2025 | 19:37
Ռուսաստանը համաձայնել է օգնել ԱՄՆ նախագահ Դոնալդ Թրամփի վարչակազմին Իրանի հետ հարաբերություններում այնպիսի հարցերի շուրջ, ինչպիսիք են Իսլամական Հանրապետության միջուկային ծրագիրը և նրա աջակցությունը տարածաշրջանում հակաամերիկյան պրոքսիներին։ Այս մասին Bloomberg-ին հայտնել են իրավիճակին ծանոթ աղբյուրները։
Թրամփը նման հետաքրքրվածության մասին ուղղակիորեն ասել է Պուտինին փետրվարին կայացած հեռախոսազրույցում, և նրա վարչակազմի բարձրաստիճան պաշտոնյաները քննարկել են այդ հարցը իրենց ռուս գործընկերների հետ օրեր անց Սաուդյան Արաբիայում կայացած բանակցությունների ժամանակ, լրատվամիջոցին ասել են Մոսկվայում աղբյուրներն անանունության պայմանով՝ հարցի զգայունության պատճառով:
Սպիտակ տան պաշտոնյաներն անմիջապես չեն արձագանքել լրատվամիջոցի մեկնաբանության խնդրանքին: Ո՛չ Ռուսաստանը, ո՛չ Իրանը հրապարակավ չեն հաստատել կամ հերքել։
Կրեմլի խոսնակ Դմիտրի Պեսկովը Bloomberg-ի հարցերին ի պատասխան ասել է, որ «Ռուսաստանը կարծում է, որ Միացյալ Նահանգները և Իրանը պետք է լուծեն բոլոր խնդիրները բանակցությունների միջոցով», և որ Մոսկվան «պատրաստ է անել ամեն ինչ՝ դրան հասնելու համար»։
Իրանի ԱԳՆ խոսնակը, պատասխանելով հարցին՝ արդյո՞ք Ռուսաստանն առաջարկել է միջնորդել Թեհրանի և Վաշինգտոնի միջև, նշել է միայն՝ «բնական» է, որ երկրներն առաջարկեն իրենց օգնությունը:
Աղբյուրներն ասել են, որ ԱՄՆ-ի և Ռուսաստանի բարձրաստիճան պաշտոնյաները, այդ թվում՝ ԱՄՆ պետքարտուղար Մարկո Ռուբիոն և ՌԴ արտգործնախարար Սերգեյ Լավրովը, փետրվարի 18-ին Էր Ռիադում կայացած հանդիպման ժամանակ քննարկել են Վաշինգտոնի շահագրգռվածությունը, որ Մոսկվան օգնի իրանական հարցերում:
Լրատվամիջոցը նշում է, սակայն, որ անհասկանալի է, թե Թեհրանը որքանով կընդունի Ռուսաստանի միջոցով ԱՄՆ-ի ցանկացած առաջարկ: Իրանի նախագահ Մասուդ Փեզեշքիանը կողմ է ԱՄՆ-ի հետ բանակցություններին, իսկ Գերագույն հոգևոր առաջնորդ Ալի Խամենեին դեմ է դրան։
Թարգմանությունը՝ Էմմա Չոբանյանի
