Մոսկվան ընդլայնում է համագործակցությունը Փհենյանի հետ. Բլինքեն

ԱՄՆ պետքարտուղար Էնթոնի Բլինքենը հայտարարել է, որ, ըստ Վաշինգտոնի, Մոսկվան ընդլայնում է համագործակցությունը Փհենյանի հետ տիեզերական ոլորտում, գրում է BBC-ի ռուսական ծառայությունը։

«ԿԺԴՀ-ն արդեն ստանում է ռուսական զինտեխնիկա և ուսուցում։ Այժմ մենք հիմքեր ունենք ենթադրելու, որ Մոսկվան մտադիր է Փհենյանի հետ կիսել առաջադեմ տիեզերական և արբանյակային տեխնոլոգիաները»,- ասել է Բլինքենը Սեուլում կայացած մամուլի ասուլիսում, որտեղ նա գտնվում է պաշտոնական այցով։ Ըստ ԱՄՆ պետքարտուղարի՝ Մոսկվան այդպիսով «վճարում է» Փհենյանին իր զինվորներին Ուկրաինայի դեմ ճակատ ուղարկելու դիմաց։

Այս գիշեր հայտնի է դարձել, որ ԿԺԴՀ-ն միջին հեռահարության բալիստիկ հրթիռ է արձակել Ճապոնիայի ուղղությամբ։ Հարավային Կորեայի ռազմական պաշտոնյաները հայտնել են, որ հրթիռը, ենթադրաբար, անցել է ավելի քան 1000 կիլոմետր, նախքան օվկիանոսն ընկնելը:

Բլինքենը նաև կրկնել է դեկտեմբերի վերջին ՄԱԿ-ում ԱՄՆ դեսպան Լինդա Թոմաս-Գրինֆիլդի հայտարարությունն այն մասին, որ Ռուսաստանը կարող է մոտ լինել Հյուսիսային Կորեայի՝ որպես միջուկային տերության կարգավիճակի ճանաչմանը, հաղորդում է AFP-ն։

Բլինքենը նաև մեկնաբանել է ուկրաինական զորքերի նոր հարձակումը Կուրսկի շրջանում և ասել, որ դա կարևոր նշանակություն կունենա ապագա բանակցությունների համար:

«Նրանց դիրքը Կուրսկում շատ կարևոր է, քանի որ, իհարկե, դա կարևոր է ցանկացած բանակցությունների համար, որոնք կարող են տեղի ունենալ գալիք տարում», – ասել է Բլինքենը:

Թարգմանությունը՝ Տաթև Ֆռանգյանի