ՔՊ-ին անդամակցելու դիմում չեմ ներկայացնելու. Սրբուհի Գալյան

Արդարադատության նախարար Սրբուհի Գալյանը Նիկոլ Փաշինյանի ղեկավարած Քաղաքացիական պայմանագիր կուսակցությանը չի անդամակցելու։ Այս մասին Factor.am-ի հարցին ի պատասխան ասաց Սրբուհի Գալյանը։

«Դիմում չեմ ներկայացնելու, կուսակցական չեմ»,- ասաց նա։

Ճշտող հարցին` ՔՊԿ-ից նման առաջարկ չի ստացե՞լ, նախարարը բացասական պատասխան տվեց։

Նկատենք, որ ի տարբերություն Գալյանի, ՔՊ-ն հրատապ կարգով կուսակցական դարձրեց Գյումրու քաղաքապետի պաշտոնակատար, անկուսակցական Սարիկ Մինասյանին։

Սրբուհի Գալյանն այս տարվա նոյեմբերի 5-ին նշանակվել է Արդարադատության նախարար՝ նախագահ Վահագն Խաչատուրյանի հրամանագրով

Մինչ այս 32-ամյա Գալյանը գլխավոր դատախազի տեղակալ էր: Պաշտոնի կտրուկ առաջխաղացումն սկսվել է Նիկոլ Փաշինյանի իշխանության օրոք. 2019-ին նշանակվեց արդարադատության փոխնախարար, մեկ տարի պաշտոնավարեց ու Գլխավոր դատախազություն տեղափոխվեց, մինչ այդ էլ՝ դեռ 2015 թվականից, Քննչական ծառայությունում է աշխատել։

Հիշեցնենք` հոկտեմբերի 30-ին վարչապետի աշխատակազմի ղեկավար Արայիկ Հարությունյանը, խորհրդարանում պատասխանելով Factor.am-ի հարցին, ասել էր` Գալյանը քաղաքական թիմի մաս է, իսկ մեր մյուս հարցին` արդյոք խնդրահարույց չէր, որ քաղաքական թիմի ներկայացուցչին բարձր պաշտոն էր տրվել դատախազությունում, Արայիկ Հարությունյանը պատասխանել էր. «Ես ասացի՝ քաղաքական պաշտոն է զբաղեցրել, իսկ այդ դեպքում տվյալ ժամանակահատվածի ժամանակ լինում է քաղաքական թիմի մի մաս: Նա եղել է փոխնախարար, որը նույնպես քաղաքական նշանակություն ունի»:

Նարեկ Կիրակոսյան