Ձերբակալվել է Վահագն Գևորգյանը

Ձերբակալվել է Ջրային կոմիտեի նախկին նախագահի ժամանակավոր պաշտոնակատար Վահագն Գևորգյանը՝ Հակակոռուպցիոն կոմիտեում քննվող գործի շրջանակում։ Տեղեկությունը Factor.am-ին հաստատեցին Հակակոռուպցիոն կոմիտեից՝ հայտնելով, որ Վահագն Գևորգյանի նկատմամբ խափանման միջոց է ընտրվել տնային կալանքը: Վարույթի շրջանակում կան մեղադրյալի կարգավիճակ ունեցող այլ անձինք ևս։ Այլ մանրամասներ չհայտնեցին՝ նախաքննության շահերից ելնելով։

Նշենք, որ Նիկոլ Փաշինյանն անցած շաբաթ էր ազատել Վահագն Գևորգյանին Ջրային կոմիտեի նախագահի ԺՊ-ի պաշտոնից։

Հիշեցնենք, որ Գևորգյանը այդ պաշտոնը զբաղեցնում էր 2021 թվականի դեկտեմբերի 17-ից։ Մինչև այդ Գևորգյանը զբաղեցնում էր Աբովյանի քաղաքապետի պաշտոնը։

Նա այդ պաշտոնում ընտրվել էր 2015 թվականին ԲՀԿ-ի ցուցակով։ Վահագն Գևորգյանը 4 տարի անց վերընտրվել էր քաղաքապետի պաշտոնում, բայց այս անգամ որպես անկուսակցական թեկնածու։ Վահագն Գևորգյանը եղել է նաև ԲՀԿ առաջնորդ, ԱԺ պատգամավոր Գագիկ Ծառուկյանը օգնականը։

Վահագն Գևորգյանին 2020 թվականին մեղադրանք էր առաջադրվել։ ՀՀ Գլխավոր դատախազությունը հայտնել էր, որ համայնքային հողամասերի ինքնակամ զավթումը, շինությունների ինքնակամ կառուցումը կասեցնելու, կանխարգելելու ուղղությամբ միջոցներ չձեռնարկելու համար մեղադրանք է առաջադրվել Աբովյան համայնքի ղեկավարին։ Աբովյանի քաղաքապետը, ըստ առաջադրված մեղադրանքի, պաշտոնեական անփութություն է դրսևորել ու թույլատրել է 2240 մետր մակերեսով հողամաս զավթել։ Բացի այս մեկից, Գևորգյանին առնչվող այլ քրեական գործեր էլ էին եղել, որոնք, սակայն, բոլորը կարճվել էին։

Մանյա Պողոսյան