Երևանի դարդ ու ցավը թողած՝ մարդիկ քաղաքական մանիպուլյացիաների մեջ են մտել. ավագանու թեկնածու. ՏԵՍԱՆՅՈՒԹ

Երևանի դարդ ու ցավը թողած՝ մարդիկ քաղաքական մանիպուլյացիաների մեջ են մտել, չգիտես՝ ինչ են ուզում անել: Այս մասին այսօր՝ սեպտեմբերի 19-ին լրագրողների հետ հանդիպմանն ասաց «Երևանի հանրություն» դաշինքից Երևանի ավագանու թեկնածու Արամ Գրիգորյանը:

Իրենք, ըստ թեկնածուի, Երևանի կառավարումը ստանձնելով՝ այն իրականացնելու են ի շահ երևանցու: «Բոլորդ գիտեք՝ մինչև հիմա ինչպես է իրականացվել Երևանի կառավարումը, սակայն պետք է գերակա լինի երևանցու շահը, երևանցու իրավունքը: Որպես օրինակ նշեմ, որ Երևանի քաղաքապետարանի կազմում կա իրավաբանական վարչություն, բայց որևէ անգամ այն չի զբաղվել Երևանի քաղաքացու իրավունքների պաշտպանությամբ: Նրանք հիմնականում զբաղվում են կորպորատիվ իրավունքների պաշպանությամբ»,- նշեց Արամ Գրիգորյանը:

«Երևանի հանրություն» դաշինքի ավագանու թեկնածուն առաջարկում է Երևանին վերաբերող խնդիրները լուծել հանրային քննարկման միջոցով: Ուսումնասիրել են միջազգային փորձն ու նշում են. աշխարհում գոյություն ունի հանրային լսումների ինստիտուտ:

«Երևանցուն, նրա շահերին և քաղաքի շահերին վերաբերող ցանկացած հարց հենց այնպես չպետք է որոշվի, պետք է հանրային քննարկում անցնի: Այս խնդիրն առաջանում է նաև՝ կապված բյուջեի հետ: Բյուջեն շատ ու քիչ չի լինում, պարզապես պետք է այն լավ կառավարել: Անցած տարիներին Երևանի բյուջեն ոչ արդյունավետ է ծախսվել. մեծ աշխատանքներ, մեծ ծրագրեր են իրականացվել՝ առանց հանրության հետ համաձայնեցնելու, արդյունքում ունենք այն, ինչ ունենք»,- հավելեց Արամ Գրիգորյանը:

Մանրամասները՝ տեսանյութում։