Ուկրաինական ԱԹՍ-ները գրոհել են Կալուգայի «Թայֆուն» ռազմարդյունաբերական գործարանը․ ՏԵՍԱՆՅՈւԹ

Ուկրաինական անօդաչու թռչող սարքերը հարձակվել են Կալուգայում գտնվող «Թայֆուն» ռազմարդյունաբերական գործարանի վրա։ Այս մասին հայտարարել է Ուկրաինայի Ազգային անվտանգության և պաշտպանության խորհրդի ապատեղեկատվության հակազդման կենտրոնի ղեկավար Անդրեյ Կովալենկոն, փոխանցում է DW-ի ռուսական ծառայությունը։

««Թայֆուն» գործարանը, որը մտնում է ռուսական ռազմարդյունաբերական համալիրի մեջ, նույնպես հարձակման է ենթարկվել Կալուգայում»,- գրել է Կովալենկոն Telegram-ում։

Այս տեղեկատվության պաշտոնական հաստատում, սակայն, առայժմ չկա։

Կալուգայի նահանգապետ Վլադիսլավ Շապշան նոյեմբերի 25-ի առավոտյան Telegram-ում գրել է, որ «գիշերը քաղաքի մատույցներում հակաօդային պաշտպանության ուժերը ոչնչացրել են 3 անօդաչու թռչող սարք»։

«Հրդեհ է բռնկվել այն վայրում, որտեղ անօդաչու թռչող սարքի բեկորներն ընկել են արդյունաբերական ձեռնարկության տարածքում։ Ըստ նախնական տեղեկությունների՝ տուժածներ չկան։ Տեղում աշխատում են ԱԻՆ և օպերատիվ խմբի աշխատակիցները»,- ասվում է կեսգիշերին մոտ արված նրա գրառման մեջ։

Ժամը 4։30-ի սահմաններում Շապշան հայտնել է, որ արդյունաբերական ձեռնարկության տարածքում բռնկված հրդեհը մարվել է։

«Ընդհանուր առմամբ, հակաօդային պաշտպանության ուժերը մեկ գիշերվա ընթացքում ոչնչացրել են 8 անօդաչու թռչող սարք»,- հավելել է պաշտոնյան։

Մանրամասները՝ տեսանյութում։