04.06.2026 | 20:07
ՊՆ-ն պարզաբանում է սահմանային անցակետերում ռազմական ոստիկանության ներկայության նպատակը
Ազգային ժողովը կրկին փնտրում է «կոռուպցիան կանխողներ»-ի. Կոռուպցիայի կանխարգելման հանձնաժողովը շուրջ 1 տարի է նախագահ չունի
Հասարակություն
03.10.2024 | 18:18
Ազգային ժողովը սեպտեմբերին կրկին Կոռուպցիայի կանխարգելման հանձնաժողովի անդամների պաշտոններում թեկնածուների ընտրության մրցույթ է հայտարարել: Հայտարարությունը տեղադրված է azdarar.am կայքում։
Թեկնածուն պետք է ունենա միայն Հայաստանի Հանրապետության քաղաքացիություն, բարձրագույն կրթություն, տիրապետի հայերենին, ունենա առնվազն հինգ տարվա աշխատանքային ստաժ, որից առնվազն երեք տարին՝ քաղաքական, ինքնավար, վարչական կամ օրենքով ստեղծված պետական մարմնի անդամի պաշտոններում կամ կազմակերպման, ղեկավարման, վերահսկման, համակարգման գործառույթներ ունեցող այլ պաշտոններում (անկախ պետական կամ մասնավոր ոլորտում կատարած աշխատանքից):
Հիշեցնենք, որ արդեն շուրջ 1 տարի է՝ Կոռուպցիայի կանխարգելման հանձնաժողովը նախագահ չունի։ Հայկուհի Հարությունյանը, որը նախագահել է կառույցը ստեղծումից ի վեր, դադարեցրել է պաշտոնավարումը 2023 թվականի նոյեմբերի 19-ին, այնուհետև կրկին դիմել է ԿԿՀ անդամի պաշտոնում աշխատանքը շարունակելու համար, սակայն չի ընտրվել Ազգային Ժողովի կողմից։ Նույնը օրը դադարել է նաև Կոռուպցիայի կանխարգելման հանձնաժողովի ևս մեկ անդամի՝ Նարեկ Համբարձումյանի պաշտոնավարման ժամկետը։ Այսինքն՝ Հանձնաժողովի 5 անդամներից մնացել է 3-ը։
Այս տարվա հուլիսին Խորհրդարանն արդեն երկրորդ անգամ չընտրեց Կոռուպցիայի կանխարգելման հանձնաժողովի անդամ: Ըստ Ազգային ժողովի պաշտոնական կայքէջում հրապարակված հայտարարության՝ 107 պատգամավորներից որևէ մեկը քվեարկությանը չի մասնակցել:
Այս ընթացքում Կոռուպցիայի կանխարգելման հանձնաժողվի նախագահի պաշտոնակատարը ԿԿՀ անդամ Մարիամ Գալստյանն է, որը հանձնաժողովի անդամ է 2021 թվականի սեպտեմբերից։ ԿԿՀ 5 անդամի պաշտոններից 2-ն առայժմ թափուր է։
Անժելա Պողոսյան
