06.10.2026 | 21:30
Գերմանիայի ԱԳ նախարարը զգուշացրել է Վրաստանի, Մոլդովայի և Բալթյան երկրների համար Ռուսաստանի սպառնալիքի մասին
Բաքուն արցախցի պաշտոնյաներին նոր մեղադրանք է առաջադրել
Քաղաքականություն
01.10.2024 | 10:51
Բաքուն Ադրբեջանում ապօրինի պահվող Արցախի նախկին ղեկավարներին ու պաշտոնյաներին նոր մեղադրանք է առաջադրել՝ պատմամշակութային հուշարձանների ոչնչացում։
Այս մասին ադրբեջանական լրատվամիջոցների հետ զրույցում ասել է Ադրբեջանի գլխավոր դատախազ Քյամրան Ալիևը։ Նա կրկին հայտարարել է, որ հարուցված քրեական գործի նախաքննությունն ավարտվել է։
«Հիմա քրեական գործի նյութերին ծանոթանալու փուլն է, դա բավականին շատ ժամանակ է պահանջում: Քանի որ տուժողները շատ են։ Միևնույն ժամանակ, մեղադրյալների իրավունքները ապահովվում են միջազգային կոնվենցիաների և ազգային օրենսդրության պահանջներին համապատասխան։ Նրացից յուրաքանչյուրն ունի մի քանի փաստաբան ու նյութերին ծանոթանալու իրավունք, քանի որ մեղադրանքները բավական լուրջ են։ Դրանք մեղադրանքներ են՝ անջատողականության, մեր պատմամշակութային հուշարձանների ոչնչացման վերաբերյալ»,- ասել է Ալիևը՝ նշելով, որ այդ գործընթացի ավարտից հետո գործը կփոխանցվի դատարան։
Ավելի վաղ Քյամրան Ալիևը հայտարարել էր, որ քրեական գործերի նախաքննությունն ավարտվել է, առաջիկայում նյութերը կփոխանցվեն դատարան։
Հիշեցնենք, որ այս տարվա ապրիլին Բաքվի դատարանը երկարացրել էր Ադրբեջանում ապօրինաբար պահվող Արցախի նախկին ու ներկա ռազմաքաղաքական ղեկավարների կալանքի ժամկետը։ 5 ամսով երկարացվել է Արցախի նախկին նախագահներ Արայիկ Հարությունյանի, Բակո Սահակյանի, Արկադի Ղուկասյանի, ԱԳ նախկին նախարար Դավիթ Բաբայանի, ԱԺ նախագահ Դավիթ Իշխանյանի, նախկին պետնախարար Ռուբեն Վարդանյանի, ՊԲ նախկին հրամանատար Լևոն Մնացականյանի և ՊԲ նախկին փոխհրամանատար Դավիթ Մանուկյանի ապօրինի կալանքի ժամկետը։
Թարգմանությունը՝ Էմմա Չոբանյանի
