06.10.2026 | 22:00
Ինչո՞ւ ՌԴ-ն չօգնեց ՀՀ-ին, ի՞նչ եղավ Արցախի հետ․ զրույց Արմեն Գրիգորյանի հետ՝ պաշտոնը թողնելուց հետո․ ՏԵՍՆՅՈՒԹ
Բլինքենը Միրզոյանին ու Բայրամովին կոչ է արել որքան հնարավոր է շուտ վերջնականացնել խաղաղության համաձայնագիրը․Պետդեպ
Քաղաքականություն
27.09.2024 | 10:56
Նյու Յորքում ՄԱԿ-ի Գլխավոր ասամբլեայի բարձր մակարդակի շաբաթվա շրջանակներում պետքարտուղար Էնթոնի Բլինքենը եռակողմ հանդիպում է ունեցել Հայաստանի ԱԳ նախարար Արարատ Միրզոյանի և Ադրբեջանի ԱԳ նախարար Ջեյհուն Բայրամովի հետ։ Այս մասին նշում է Պետքարտուղարության մամուլի խոսնակ Մեթյու Միլլերը՝ ներկայացնելով մանրամասներ հանդիպումից։
«Պետքարտուղար Բլինքենը գովել է երկու նախարարներին այն առաջընթացի կապակցությամբ, որ Հայաստանը և Ադրբեջանը հասել են կայուն և արժանապատիվ խաղաղության հաստատման ուղղությամբ և խրախուսել է երկու երկրների շարունակական առաջընթացը՝ որքան հնարավոր է շուտ համաձայնագիրը վերջնականացնելու։ Պետքարտուղարն ընդգծել է, որ խաղաղության համաձայնագիրը տարածաշրջանին կբերի մեծ կայունություն և բարգավաճում»,-ասվում է հաղորդագրության մեջ։
Ավելի վաղ ՀՀ ԱԳՆ-ն հայտնել էր, որ կողմերը հանդիպման արդյունքներով համաձայնել են ներդնել լրացուցիչ ջանքեր «Խաղաղության և միջպետական հարաբերությունների հաստատման մասին» համաձայնագրի՝ ամենասեղմ ժամանակահատվածում կնքման ուղղությամբ։
Թարգմանությունը՝ Էմմա Չոբանյանի
