«Յուվենտուս»-ը Հայաստանում ֆուտբոլային ակադեմիա կհիմնի 

Գործադիրն այսօր չզեկուցվող հարցով հավանություն տվեց  «Նեքստ Ջեն Սպորտս» ՍՊԸ ներկայացրած ծրագրին և որոշել «Հրազդան մարզահամալիր» ՓԲԸ-ի պետական սեփականություն հանդիսացող բաժնետոմսերը ուղղակի վաճառքով մասնավորեցնել։

«ՀՀ սեփականություն հանդիսացող Երևան, Ավան Աճառյան փողոց 20/4 հասցեում գտնվող 4949,3 քառ.մետր ընդհանուր մակերեսով շենք, շինություններն ու 444,5 գծամետր պարիսպը և 6664 քառ.մետր մակերեսով ֆուտբոլի դաշտը հետ կվերցվի ՀՀ ԿԳՄՍՆ «Խաղային մարզաձևերի օլիմպիական մանկապատանեկան մարզադպրոց» ՊՈԱԿ–ից և Հայաստանի ֆուտբոլի ֆեդերացիայի «Տեխնիկական կենտրոն-ակադեմիա» ՓԲԸ–ից»,- ասված է կառավարության հիմնավորման մեջ:

Կառավարության լրատվականից Factor.am-ին պարզաբանեցին, որ որոշումը վերաբերվում է ոչ թե  «Հրազդան» մարզադաշտին, այլ «Հրազդան մարզահամալիր»-ին պատկանող տարածքին, որը գտնվում է Ավան Աճառյան փողոց 20/4 հասցեում ֆուտբոլի ակադեմայի հարևանությամբ։

ՀՏԿԵՆ պետական գույքի կառավարման կոմիտեին ամրացված գույքի շուկայական արժեքը գնահատված է 3 մլրդ 771 մլն 900 հազար դրամ։ Ուղղակի վաճառքի ձևով մասնավորեցման ենթակա բաժնետոմսերի վաճառքի գինը սահմանվել է 3 մլրդ 036 լն 932.7 հազար դրամ։

Այս գույքի վաճառքի գնի 70 տոկոսն ուղղվելու է ՀՀ պետական բյուջե, իսկ 30 տոկոսը` համապատասխան համայնքի ֆոնդային բյուջե` ըստ գույքի գտնվելու վայրի:

Ընկերությունը պարտավորվել է  5 տարվա ընթացքում կատարել 1 մլրդ դրամի ներդրումներ, որից 20 000 000 դրամը՝ 1-ին տարում, 500 000 000 դրամը՝ 2-րդ տարում։ Այս տարածքում նախատեսվում է հիմնել «Յուվենտուս» ֆուտբոլային ակադեմիա։

«Նեքստ Ջեն Սպորտս» ընկերության այս տարի կնքել է պայմանագիր աշխարահռչակ «Յուվենտուս» ակումբի հետ՝ Հայաստանում ֆուտբոլային ակադեմիա հիմնելու համար։ 

Juventus Academy Armenia ֆեյսբուքյան էջն իր հերթին հայտարարություն է տարածել՝ տեղեկացնելով, որ ակադեմիան ունենալու է երկու տեղակայում, մեկը` Ավան Աճառյան 20/4 հասցեում, մյուսը` Ծիծառնակաբերդի խճուղի 2/3 հասցեում՝ «Հրազդան» մարզադաշտի հարևանությամբ: Կկառուցվի նաեև բարձրակարգ հյուրանոց իր ֆուտբոլային ենթակառուցվածքներով, որը կլինի առաջինը Երևան քաղաքում:

Մանյա Պողոսյան