«Եթե ժողովուրդն է ձևավորում ԱԺ-ն, ինքն էլ պիտի լուծարի»․ Գևորգ Պետրոսյան. ՏԵՍԱՆՅՈՒԹ

Գևորգ Պետրոսյանը չգիտի, թե ի՞նչն է խանգարում այս Ազգային ժողովին, որպեսզի այն աշխատի մինչև 2022 թվականը, կառավարությունը միշտ էլ կարող է ներկայացնել նախագծեր, իսկ խորհրդարանը քննարկի դրանք։ «Ես չեմ կարծում, որ որևէ մեկը դրան դեմ քվեարկի հենց միայն նրա համար, որ դա ներկայացրել է ԱԺ-ում փոքրամասնություն համարվող քաղաքական ուժի՝ «Ելք» դաշինքի կառավարությունը»,- ասում է Գևորգ Պետրոսյանը։

Իրավաբան պատգամավորի անձնական կարծիքով՝ աննորմալ չէ, որ խորհրդարանում քաղաքական մեծամասնություն է մի ուժ, իսկ կառավարությունը ձևավորում է մեկ այլ ուժ, պարզապես գործող Սահմանադրությունն այսպիսի իրավիճակի լուծում չի առաջարկել: «Ինչու չէ, թող լինի ԱԺ-ում փոքրամասնության ներկայացուցիչը կառավարության ղեկավար, բայց եթե էդ կառավարությունը լինի հօգուտ ժողովրդի, մենք պատրաստ ենք ծափահարել, համագործակցել»,-առաջարկում է կոալիցիոն իշխանության ներկայացուցիչը։

Խորհրդարանի ինքնալուծարմանն անդրադառնալով պատգամավորը տեղեկացրեց, որ խմբակցությունն այդ գաղափարը չի քննարկել բայց իր կարծիքով դրա կարիքն առայժմ չկա․ «Եթե ժողովուրդն է ձևավորում ԱԺ-ն, ապա այն լուծարելու իրավասությունը պետք է տրվի ժողովրդին»։

Հանրապետական Գալուստ Սահակյանն ընդհանրապես ինքնալուծարումից լավ հոտ չի առնում, բնավ կարիք չկա, որ այս խորհրդարանն ինքնալուծարվի։ «Խորհրդարանի ինքնալուծարումը կնշանակի շատ վատթար իրավիճակ քաղաքական պրոցեսներում Հայաստանում, այդ դեպքում մենք պիտի մտածենք, թե ինչպիսի պրոցեսներ կունենանք»,- ասում է պարոն Սահակյանը։

Նա դեմ չէ, որ խմբակցությունը հանդիպի Նիկոլ Փաշինյանի հետ և փորձի հասկանալ նրա ուզածը․ «Ես, իմիջիայլոց, էդ հանդիպումներին դեմ անձնավորություն չեմ»։

Իշխող ՔՊ անդամ Ալեն Սիմոնյանն ասում է, որ Հանրապետականի խորհրդարանում մնալն ինքնին խնդիր է, որովհետև այս խորհրդարանը հասարակության քաղաքական համակրանքների պատկերը չէ։ «ՀՀ-ում փոխվել է իրավիճակ, և, տեսեք, հիմա խոսվում է ընտրակաշառքի մասին, ասում են՝ ընտրակաշառքն ըսենց, ընտրակաշառքն ընենց։ Պարոն Կոստանյանը եղել է ՀՀ գլխավոր դատախազ, բայց հիմա ասում է՝ վտանգ կա սրա հետ կապված։ Բա վտանգ կա՝ գլխավոր դատախազ է եղել»,- հիշեցնում է «Ելք» խմբակցության անդամը։

Պարոն Սիմոնյանը վստահեցնում է, որ ընտրություններն անխուսափելի են, թե ինչ ճանապարհով, դեռ պարզ չէ․ «Ամենաօրինական ձևով է լինելու»։

Ի դեպ, պատգամավորը մեկնաբանեց նաև դերասան Հովհաննես Ազոյանի «Քաղաքացիական պայմանագրին» անդամակցելու տեղեկությունը։ Լրագրողներից մեկը նկատեց, որ դերասանը ժամանակին ուրախացնում էր Սերժ Սարգսյանին և Հանրապետականին. «Շատ ուրախ եմ, որ ինքը անդամակցել է, որովհետև այսօր ՀՀ-ում կուսակցական դառնալն ամենևին չի ենթադրում, որ դու ինչ-որ պաշտոն ես զբաղեցնելու»։

Այնուամենայնիվ, դերասանը դեռ կուսակցության անդամ չէ, նրա դիմումը նոր է ընդունվել և մնացած դիմումների հետ կքննարկվի։

Մհեր Արշակյան