Տնտեսություն
26.07.2024 | 11:00
Ռուսաստանի Դաշնության կողմից հայկական 16 ընկերությունների արտադրանքի ժամանակավորապես սահմանափակելու որոշման հարցում ռուսական կողմի հետ բանակցությունները շարունակվում են, բայց այս պահի դրությամբ որևէ արդյունք չկա, այս մասին Factor.am-ի հետ զրույցում ասաց ՍԱՏՄ իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը։
Նրա փոխանցմամբ՝ ՍԱՏՄ-ն ստուգումներ է անցկացնում այն ընկերություններում, որոնց արտադրանքում ռուսական կողմից խախտումներ էին արձանագրվել։
«Արտադրանքում պեստիցիդների մասով ստուգումներ կարող ենք սկսել միայն բողոքի հիման վրա։ Ռուսաստանի նամակը մենք ընդունում ենք բողոք և դրա հիման վրա էլ այդ ընկերություններում սկսել ենք ստուգումներ»,- մանրամասնեց ՍԱՏՄ ներկայացուցիչը։
Հիշեցնենք, որ հուլիսի 17-ին ՀՀ սննդամթերքի անվտանգության տեսչական մարմինը ՌԴ անասնաբուժական և բուսասանիտարական վերահսկողության դաշնային ծառայությունից («Ռոսսելխոզնադզոր») նամակ է ստացել այն մասին, որ Հայաստանից Ռուսաստան արտահանվող պտուղ-բանջարեղենի ապրիլ-հունիս ամիսների խմբաքանակներում արձանագրել է խախտումներ և կայացրել հուլիսի 15-ից ՌԴ տարածք հայաստանյան 16 ընկերությունների արտադրանքի մատակարարումը ժամանակավորապես սահմանափակելու որոշում։
Գերատեսչությունից նաև նշել էին, որ ստեղծված իրավիճակի կապակցությամբ սկսվել են բանակցություններ երկու կառույցների մասնագետների մասնակցությամբ:
Ավելի վաղ լոլիկի մշակությամբ զբաղվող ընկերություններից մեկից Factor.am-ին տեղեկացրել էին, որ ռուսական կողմն իրենց ևս արգելել է բանջարեղեն արտահանել՝ պատճառաբանելով, թե արտադրանքում պեստիցիդների առկայությունը գերազանցում է թույլատրելի շեմը։ Ընկերությունից, սակայն, պնդում են, որ խախտումներ չունեն։
Մանյա Պողոսյան
