Քամալա Հարիսը սկսել է ընտրություններում առաջադրվելու համար պայքարը․ նա արդեն ունի Քլինթոնների ու Կալիֆորնիայի նահանգապետի աջակցությունը

ԱՄՆ փոխնախագահ Քամալա Հարիսը հայտարարել է, որ երախտագիտությամբ է ընդունում Ջո Բայդենի աջակցությունը, որը հրաժարվել է մասնակցել նախընտրական արշավին և առաջարկել է իրեն առաջադրել որպես Դեմոկրատական կուսակցության թեկնածու։ Հաղորդվում է, որ նա արդեն սկսել է պայքարել առաջադրման համար՝ փորձելով աջակցություն ստանալ կուսակիցների կողմից, գրում է BBC-ի ռուսական ծառայությունը:

«Ինձ համար պատիվ է ունենալ նախագահի աջակցությունը, և ես մտադիր եմ առաջադրվել: Ես կանեմ ինձնից կախված ամեն ինչ՝ միավորելու Դեմոկրատական կուսակցությունը և միավորելու մեր ազգը՝ հաղթելու Դոնալդ Թրամփին։ Ընտրությունների օրվան ունենք 107 օր։ Մենք կպայքարենք միասին և կհաղթենք՝ միասին»,- ասել է նա։

Փոխնախագահի խոսքով՝ Բայդենի՝ ընտրություններից դուրս գալու որոշումը հայրենասիրության օրինակ է։ «Նախագահ Բայդենն անում է այն, ինչ արել է իր ողջ կյանքում՝ առաջին տեղում դնելով ամերիկյան ժողովրդի և մեր երկրի շահերը»:

Դեմոկրատները դեռ պաշտոնական թեկնածու չունեն. չնայած այն բանին, որ Բայդենը աջակցություն է հայտնել Հարիսին, չի կարելի ասել, որ նա մրցակիցներ չի ունենա։ Քվեարկությունը տեղի կունենա օգոստոսի 19-ին Չիկագոյում բացվող Դեմոկրատական կուսակցության ազգային համագումարում:

Աղբյուրները BBC-ին հայտնել են, որ Հարրիսն արդեն սկսել է հեռախոսազանգեր կատարել կիրակի ուշ երեկոյան՝ ապահովելու նշանավոր դեմոկրատների, այդ թվում՝ օրենսդիրների և նահանգապետերի աջակցությունը:

Հարիսի թեկնածության օգտին արդեն արտահայտվել են Քլինթոն ամուսինները՝ ԱՄՆ նախկին նախագահն ու պետքարտուղարը։ X սոցիալական ցանցում հրապարակված հայտարարության մեջ Բիլ և Հիլարի Քլինթոնները գրել են․
«Այժմ ժամանակն է աջակցել Քամալա Հարիսին և պայքարել այն ամենով, ինչ ունենք նրան ընտրելու համար։ Մենք ունեցել ենք մեր վերելքներն ու վայրէջքները, բայց ոչինչ մեզ չի ստիպել ավելի մտահոգվել երկրի ապագայով, որքան Թրամփի երկրորդ ժամկետի սպառնալիքը»: