Ավագանու թեկնածուները պատասխանում են Հայկ Մարությանին. ՏԵՍԱՆՅՈՒԹ

«Քաղաքացիական պայմանագիր» կուսակցության քաղաքապետի թեկնածու Հայկ Մարությանի «Մեր դեմ խաղ չկա» արտահայտությունը Երևանի ավագանու ընտրություններին մասնակցող այլ ուժերը ոգևորությամբ չեն ընդունել։ Հայկի այդ արտահայտությունը ժառանգականներին չի վհատեցրել, «Ժառանգությունը» հեղափոխության հետ է։ «Իմ քայլը» դաշինքի քաղաքապետի թեկնածուն նաև ասել էր, որ դաշտում այսօր կան միայն սևեր և սպիտակներ։ «Ժառանգության» համար չկան սև և սպիտակ դաշտեր»,- հակադարձում է կուսակցության փոխնախագահ Արմեն Մարտիրոսյանը։

Նա արդեն տեղեկացել է, որ Հայկ Մարությանը զղջացել է իր արտահայտության համար․ «Հայկ Մարությանն ընդունել է, որ բոլորս մահկանացուներ ենք և սխալվելու իրավունք ունենք բոլորս»։

«Ժառանգությունը», սակայն, ակնարկում է, որ բոլորի դեմ էլ խաղ կա, ի վերջո, Րաֆֆի Հովհաննիսյանի գլխավորած քաղաքական ուժը լուրջ անցյալ ունի։ «Հույս ունենք, որ քաղաքացիների կողմից «Ժառանգության» այս տարիների անբասիր վարքագիծը և աշխատանքը կգնահատվի»,- ասում է պարոն Մարտիրոսյանը։

«Օրինաց երկրի» քաղաքապետի թեկնածու Մհեր Շահգելդյանը ընդհանրապես անընդունելի է համարում «Մեր դեմ խաղ չկա» արտահայտությամբ պայքարի մեջ մտնելը։ «Ցավոք այս կարգախոսը Հայաստանում բերեց այս վիճակին, եթե ոչ կործանման, ապա լրջագույն խնդրի»,- նկատում է ՕԵԿ փոխնախագահը։

Նա ոչ միայն համաձայն չէ Հայկ Մարությանի հետ, այլև հիշեցնում է, որ այն կարող է հեղափոխություն ապրած Հայաստանի վրա թանկ նստել։ «Ըստ էության, «մեր դեմ խաղ չկա», «ով մեր հետ չէ, մեր դեմ է», չեն նպաստում ժողովրդավարությանը»,- պնդում է նախկին իշխանությունների կոալիցիոն գործընկերը։

«Երևանի հանրություն» դաշինքի թեկնածու Անահիտ Թարխանյանը մյուսների նման համոզված է, որ այսօրվա Հայաստանին պառակտող հայտարարություններ պետք չեն։ «Այդպիսի տեսակետը, որը կարող է ինչ-որ պառակտում բերի հանրության համար: Բաժանող հնարքներ են»,- համոզված է տիկին Թարխանյանը։

Ըստ տիկին Թարխանյանի, այնուամենայնիվ յուրաքանչյուր քաղաքական ուժ ինքն է որոշում հանրության հետ շփվելու մարտավարությունը։ Իրենք համենայնդեպս տրամադրված են մարտական, իսկ դաշինքի քաղաքապետի թեկնածուն անձամբ գնում է հաղթելու․ «Շնորհիվ այն մարդկանց, մեր ընտրողի, որը կայացած երևանցի է, որը հստակ գիտի իր առավելությունները, գրագետ է, կիրթ է»։

Ի դեպ, այն հարցին, թե, այնուամենայնիվ, հեղափոխություն իրականացրած «Քաղաքացիական պայմանագրի» դեմ խաղ կա՞, տիկին Թարխանյանը նկատեց, որ դաշինքն իրեն պատկերացնում է քաղաքական հարցերից դուրս։

Մհեր Արշակյան