Բռնարար տղամարդու ազատությունը մեկ տարով կսահմանափակվի

Factor.am-ի կողմից լուսաբանվող ընտանեկան բռնության գործերից մեկի դատաքննությունը ևս ավարտվել է և կայացվել է դատավճիռ։ Գեղարքունիքի մարզի ընդհանուր իրավասության դատարանն այս տարվա հունիսին 33-ամյա տղամարդուն մեղավոր է ճանաչել նրան մեղսագրվող երկու հանցանքներում՝ մերձավոր ազգականի առողջությանը թեթև մարմնական վնաս հասցնելու (ՀՀ քրեական օրենսգրքի 171-րդ հոդվածի 2-րդ մասի 6-րդ կետ) և նյութական կախվածության մեջ գտնվող մերձավոր ազգականի նկատմամբ հոգեկան ներգործություն ունենալու համար (194-րդ հոդվածի 2-րդ մասի 4-րդ և 5-րդ կետեր):

Մեղադրանքի համաձայն՝ Գ.Գ.-ն 2023թ. հունվարի 6-ին իրենց տանը կենցաղային հարցերի շուրջ առաջացած վիճաբանության ընթացքում վառարանի երկաթյա կրակխառնիչով հարվածներ է հասցրել իր կնոջ՝ Ա․ Վ․-ի մարմնի տարբեր մասերին՝ պատճառելով մարմնական վնասվածք: Բացի այդ, 2022թ. օգոստոսից սկսած արգելել է կնոջը շփվել իր հարազատների հետ, վերահսկել է վերջինիս հեռախոսազանգերը, սոցիալապես մեկուսացրել, ստիպել է կտրել երկար մազերը:

Մեղադրյալը դատարանում ընդունել է մեղադրանքը և դատարանին խնդրել է կիրառել արագացված դատալսում։ Քրեական գործն արագացված վարույթի կարգով քննելով՝ դատարանը վճռել է յուրաքանչյուր հոդվածի համար 6 ամսով սահմանափակել բռնարար տղամարդու ազատությունը՝ ընդհանուր մեկ տարով։ Մեղավոր ճանաչված տղամարդու վարքագծի նկատմամբ վերահսկողությունը դրվել է ՀՀ արդարադատության նախարարության պրոբացիայի ծառայության վրա:

Նշենք, որ ՀՀ քրեական օրենսգիրքը սահմանում է, որ Ազատության սահմանափակումը դատապարտյալին առանց ուսումնառությունից կամ աշխատանքից կտրելու տնային պայմաններում հսկողության տակ պահելն է: Ընտանեկան բռնության հետ կապ ունեցող հանցատեսակների դեպքում էականն այն է, որ բռնարարն այլևս չմոտենա բռնության ենթարկված անձին, չփորձի կապի դուրս գալ հեռահաղորդակցության միջոցներով։

Արման Ղարիբյան

Նկարազարդումը՝ Ելենա Ակոջյանի