11.08.2026 | 17:28
Գազամատակարարման պլանային դադարեցումներ՝ Երևան և Գյումրի քաղաքներում
Իշխան Զաքարյանը, որն ընդդիմության հույսն է Փաշինյանի իմփիչմենթ սկսելու, Արայիկ Հարությունյանի հետ նիստ է անցկացրել
Քաղաքականություն
31.05.2024 | 16:44
Ընդդիմադիր «Պատիվ ունեմ» խմբակցության ցուցակով խորհրդարան անցած Իշխան Զարքարյանն այսօր վարչապետի աշխատակազմի ղեկավարի հետ մասնակցել է «Համահայկական խաղերի համաշխարհային կոմիտե» ՀԿ գործադիր կոմիտեի նիստին։ Այս մասին Factor.am-ը տեղեկանում է ՀՀ կառավարության տարածած հաղորդագրությունից։ Հիշեցնենք, որ Զաքարյանը Համահայկական խաղերի համաշխարհային կոմիտեի նախագահն է։
Երբ Տավուշի թեմի առաջնորդ Բագրատ արքեպիսկոպոս Գալստանյանը հայտարարեց Նիկոլ Փաշինյանին խորհրդարանի միջոցով անվստահություն հայտնելու և պաշտոնանկ անելու մասին, Զաքարյանը հայտնվեց քննարկումների կենտրոնում։ Ըստ ԱԺ Կանոնակարգ-սահմանադրական օրենքի այդ գործընթացը սկսելու համար անհրաժեշտ է 36 պատգամավորի ստորագրություն։ «Հայաստան» և «Պատիվ ունեմ» խմբակցությունները միասին ունեն 35 պատգամավոր, 36-րդը կարող է լինել «Պատիվ ունեմ»-ի հետ կապերը խզած Զաքարյանը, սակայն, նա դեռ որևէ դիրքորոշում չի հայտնել՝ միանո՞ւմ է գործընթացին, թե՞՝ ոչ։
Չնայած Զաքարյանի լռությանը՝ մայիսի 12-ին Բագրատ արքեպիսկոպոս Գալստանյանը հայտարարեց, որ հանդիպել է Իշխան Զաքարյանին ու «նա չի մերժել միանալ այս գործընթացին»։
Իշխան Զաքարյանից մեզ առ այսօր չի հաջողվել թեմայի վերաբերյալ մեկնաբանություն ստանալ։
Նարեկ Կիրակոսյան
