Ինչու է խարխլվել առանձնատան հիմքը․ քաղաքացին պնդում է՝ պատճառը հարևանությամբ տարվող շինարարությունն է. ՏԵՍԱՆՅՈՒԹ

Ժենյա Պողոսյանը հորդառատ անձրևներից հետո է նկատել, որ իր տան հիմքը խարխլվել է։ Պատմում է՝ պատճառը դեռ 2020 թվականին հողատարածքին կից սկսված շինարարությունն է։ Պողոսյանի խոսքով՝ իր տան հարևանությամբ կառուցվող շենքի հիմքի փորման աշխատանքների ժամանակ իր հողատարածքից գրունտի հոսք է տեղի ունեցել։ Ասում է՝ եթե կառուցապատողն առանձնատներին մոտ նման բարձրահարկ շենք էր մտադիր կառուցել, պետք է հաշվի առներ նաև այս վտանգն ու ամրացման աշխատանքներ իրականացներ։

Ժենյա Պողոսյանը պնդում է՝ նորակառույց շենքի ավտոկայանատեղին իր տնից ընդամենը 1 մետր հեռավորության վրա է, այնինչ պետք է պահպանվեր 6 մետրը։ Նրա խոսքով՝ կառուցապատող ընկերությունից էլ հակադարձում են, որ հողի հոսքը վատ ջրահեռացման համակարգի հետևանք է։

Ժենյան դիմել է Հակակոռուպցիոն կոմիտե, Երևանի քաղաքապետարան և կառուցապատող ընկերությանը, ներկայացրել, թե ինչ վնասներ է կրել իր հարևանությամբ իրականացվող շինարարական աշխատանքների հետևանքով։ Պետական կառույցներից դեռ պատասխան չի ստացել, իսկ կառուցապատող ընկերությունից էլ, նրա խոսքով, ասել են՝ ում էլ դիմի, մեկ է՝ ոչինչ չի կարող անել։

Եթե պետական կառույցներից խնդրին չարձագանքեն, մտադիր է դիմել դատարան՝ կառուցապատող ընկերությունից իր կրած վնասների փոխհատուցում ստանալու պահանջով։

Նորակառույց շենքի կառուցապատողը «Օրիենթ Սթոն» ՍՊԸ-ն է։ Factor TV-ն զանգահարեց շենքի տարածքում փակցված ցուցանակի վրա նշված կառուցապատող ընկերության հեռախոսահամարին, սակայն մեր զրուցակիցը հայտարարեց, թե կապ չունի ընկերության հետ։

Ըստ իրական շահառուների վերաբերյալ հայտարարագրի՝ ընկերության 100 տոկոս բաժնեմասը պատկանում է Ռոբերտ Եղիազարյանին։ 2021 թվականից ընկերության տնօրենը Գրիգոր Ենգիբարյանն է։ Ընկերության կանոնադրական կապիտալը, անցած տարվա նոյեմբերի դրությամբ, կազմել է 49 մլն 769,185 դրամ։ Ընկերության և մասնակիցների նկատմամբ արգելքներ են կիրառվել, որի հետևանքով հօգուտ պետության գանձվել է 19 մլն 108 հազար դրամ։

Մանրամասները՝ տեսանյութում։

Անի Թամրազյան