06.09.2026 | 22:03
«Սուրբ Հովհաննես» մատուռ բարձրացող քաղաքացին վնասել է ոտքը․ փրկարարներն օգնել են
ՎԶԵԲ-ը 10 մլն եվրո կտրամադրի Սյունիքում մաքսային և լոգիստիկ կենտրոնի կառուցման համար
Տնտեսություն
14.05.2024 | 19:22
Վերակառուցման և զարգացման եվրոպական բանկը (ՎԶԵԲ) Հայաստանին 10 մլն եվրո է տրամադրում Սյունիքի մարզում մաքսային և լոգիստիկ կենտրոնի կառուցումը ֆինանսավորելու համար։ Բանկը 2 միլիոն եվրո ներդրումային դրամաշնորհ կտրամադրի իր բաժնետերերի հատուկ հիմնադրամի միջոցով՝ ծրագրի համաֆինանսավորման համար: Նշվում է, որ երկրի լոգիստիկ և մաքսային նոր կենտրոնը կբարձրացնի մաքսազերծման ծառայությունների արդյունավետությունը և կօգնի բավարարել աճող պահանջարկը՝ առևտրի ծավալների վերջին աճի պայմաններում:
Վարկային և դրամաշնորհային պայմանագրերն այսօր ստորագրել են Հայաստանի ֆինանսների նախարար Վահե Հովհաննիսյանը և ՎԶԵԲ փոխնախագահ Մատեո Պատրոնեն Երևանում ՎԶԵԲ ամենամյա հանդիպման և բիզնես ֆորումի ժամանակ։ Ծրագիրը ՎԶԵԲ-ի փախստականների ճգնաժամին արձագանքման մաս է կազմում և ներառում է փախստականների ինտեգրման ծրագիր: Ծրագիրը կաջակցի մինչև 150 փախստականի՝ ձեռք բերելու հմտություններ և հավաստագրեր, որոնք նրանց անհրաժեշտ են՝ դառնալու որակավորված թեկնածուներ Հայաստանի պետական և մասնավոր հատվածներում մաքսային և լոգիստիկ ոլորտներում աշխատանքի տեղավորման համար: Սյունիքի նոր մաքսային կենտրոնը կտեղակայվի Հյուսիս-Հարավ ճանապարհային միջանցքի Սիսիան-Քաջարան նոր կառուցվող հատվածում։
ՎԶԵԲ-ը Հայաստանի խոշորագույն ինստիտուցիոնալ ֆինանսավորողներից մեկն է։ Վերջին հինգ տարիների ընթացքում Բանկը 640 մլն եվրո է ներդրել երկրում՝ աջակցելով մասնավոր հատվածի զարգացմանը, ենթակառուցվածքների բարելավմանը, վերականգնվող էներգիայի արտադրությանը և գյուղական համայնքների թվայնացմանը: Մինչ օրս ՎԶԵԲ-ն ավելի քան 2,1 միլիարդ եվրո է ներդրել Հայաստանի 211 ծրագրերում:
Անի Թամրազյան
