30.05.2026 | 16:48
Հանրապետության տոնի առթիվ ՀՀ հակակոռուպցիոն կոմիտեի նախագահի հրամանով մի շարք ծառայողներ են պարգևատրվել
Վրաստանի խորհրդարանի հանձնաժողովը 3-րդ ընթերցմամբ ընդունել է «օտարերկրյա գործակալների մասին» օրինագիծը․ Թբիլիսիում ոստիկանությունը բռնություն է գործադրել ցուցարարների նկատմամբ․ ՏԵՍԱՆՅՈՒԹ
Քաղաքականություն
13.05.2024 | 11:36
Վրաստանի ՆԳՆ աշխատակիցները ֆիզիկական բռնություն են գործադրել «օտարերկրյա գործակալների մասին» օրինագծի դեմ բողոքի ակցիայի մի քանի մասնակիցների նկատմամբ, հաղորդում են վրացական լրատվամիջոցները։ Ընդդիմադիր հեռուստաալիքների նկարահանած կադրերում երևում է, թե ինչպես ցուցարարներից մեկին բերման ենթարկելիս մի քանի իրավապահներ միաժամանակ հարվածներ են հասցնում նրա դեմքին և գլխին։
Մեկ այլ տեսանյութում հատուկ ջոկատայինների խումբը շրջապատել է գետնին տապալված բողոքի ակցիայի մասնակցին և ոտքերով հարվածներ են հասցնում նրան։ Եվս մեկ ցուցարարի իրավապահները բառացիորեն դուրս են քաշում ամբոխի միջից և քարշ տալով մի կողմ տանում: Հաջորդ կադրերում երևում է, թե ինչպես են սկսում ծեծել նրան։
Հաղորդվում է, որ կան ձերբակալվածներ։ Գրուզիա օնլայնի հաղորդմամբ՝ վաղ առավոտյան ոստիկանները մաքրել են խորհրդարանի կողային և հետևի մուտքերը, ժամանակ առ ժամանակ բախումներ են տեղի ունեցել ցուցարարների հետ: Ձերբակալվածների ստույգ թիվը դեռևս հայտնի չէ։
Վրաստանի խորհրդարանի իրավական հարցերի հանձնաժողովը երրորդ ընթերցմամբ ընդունել է «օտարերկրյա գործակալների մասին» օրինագիծը, հայտարարել է ընդդիմադիր պատգամավոր Եկատերինա Խերխեուլիձեն։
Net Gazeti-ի փոխանցմամբ՝ ընդդիմադիր պատգամավորները հայտարարել են, որ ոստիկաններն իրենց կանգնեցրել են՝ թույլ չտալով մասնակցել նիստին:
