11.12.2025 | 23:40
Կոնֆերենցիաների լիգա․ «Նոան» հաղթեց «Լեգիային» ու մոտ է փլեյ-օֆֆի ուղեգրին
Վրաստանի իշխանությունները որոշել են իրենց հակառակորդների ցուցակ կազմել
Քաղաքականություն
08.05.2024 | 18:41
Վրաստանի իշխող «Վրացական երազանք» կուսակցությունը հայտարարել է տվյալների բազա ստեղծելու մասին, որտեղ մուտքագրվելու են «օտարերկրյա գործակալների» մասին օրինագծի դեմ բողոքի ակցիաների մասնակիցները։ Խորհրդարանի նախագահ Շալվա Պապուաշվիլին նշել է, որ սև ցուցակում առաջին հերթին ներառվելու են «բռնության, սպառնալիքների և շանտաժի մեջ ներգրավված անձինք», ինչպես նաև նրանք, ովքեր «հրապարակայնորեն հավանություն են տվել նման գործողություններին», փոխանցում է The Moscow Times-ը։
«Օրենքի և Սահմանադրության շրջանակում այդ անձանց նկատմամբ ձեռնարկվելու են բոլոր միջոցները, որպեսզի իրավախախտները չմնան առանց պետական և հասարակական արձագանքի»,- նշել է նա։
Պապուաշվիլիի խոսքով՝ տվյալների բազայում կներառվեն նաև նրանք, ովքեր ագրեսիվ կերպով իրենց դիրքորոշումը կհայտնեն սոցիալական ցանցերի միջոցով կամ հավանություն կտան այլոց արմատական հայացքներին։
«Կարևոր է, որ այդ մարդիկ հասկանան՝ դրանք իրենց սենյակում ասված խոսքեր չեն, այլ հրապարակային հայտարարություններ են, որոնք ատելություն և հակասություն են հրահրում հասարակության մեջ»,- ասել է նա՝ հավելելով, որ տվյալները կտեղադրվեն հատուկ կայքում, որը հասանելի կլինի քաղաքացիներին։
Պապուաշվիլին նաև մեղադրել է ընդդիմադիր «Միացյալ ազգային շարժում» կուսակցությանը «ատելության արշավ» կազմակերպելու և «խաղաղ բողոքի մշակույթը ոչնչացնելու» փորձի մեջ, որով վրաց հասարակությունը միշտ հպարտացել է։
Վրաստանի խորհրդարանը մայիսի 1-ին երկրորդ ընթերցմամբ ընդունել է «Օտարերկրյա ազդեցության թափանցիկության մասին» օրինագիծը։ Երրորդ՝ վերջին ընթերցումը նշանակված է մայիսի 13-ին։ Ապրիլից Թբիլիսիում այս օրինագծի դեմ ամենօրյա բողոքի ակցիաներ են տեղի ունենում, որոնք ուղեկցվում են ոստիկանության հետ բախումներով։ Ակցիայի մասնակիցներին ուժի կիրառմամբ ցրում են և ձերբակալում։
