Փաշինյանը հակառուս է խաղում, բայց իրագործում է ՌԴ-ի և Ադրբեջանի ցանկացած պահանջ․ կասկածում եմ, թե միջանցքը կարմիր գիծ է․ Արամայիս Աղաբեկյան. ՏԵՍԱՆՅՈՒԹ

Ասուլիսում Նիկոլ Փաշինյանն ասաց, որ սահմանազատման «90 տոկոսն արդեն արված է», սահմանային սյուները դառնում են անվտանգային երաշխիք Ոսկեպարի, Կիրանցի, Բերքաբերի, Բաղանիսի և ՀՀ համար, նշեց գործադիրի ղեկավարը․ «Այս պահի դրությամբ աշխատանքի մեծ մասն արված է արդեն՝ 90 տոկոսն արդեն արված է, և ինչքան այդ աշխատանքն առաջ է գնում, ավելի է ուժեղանում այն համոզմունքը, որ ձևավորվում են անվտանգային երաշխիքներ և պատերազմը զրկվում է հիմքից, պատերազմը դառնում է անտրամաբանական, պատերազմը դառնում է ոչ լեգիտիմ: Միայն Կիրանցի և Ոսկեպարի խնդիրը չենք լուծում, այլ՝ ՀՀ-ի։ Գործընթացն ունի մեկ նպատակ՝ անիմաստ, անտրամաբանական, անիրագործելի դարձնել պատերազմը։ Պատերազմը զրկել տեղի ունենալու հիմքից»։

«Մարտական եղբայրության» անդամ Արամայիս Աղաբեկյանը Factor TV-ին տված հարցազրույցում անհամաձայնություն է հայտնում այս գաղափարի հետ։

«Ի սկզբանե այդ գնահատականը մանիպուլյատիվ է, որովհետև հարցն այդ չորս գյուղերի կամ սահմանագծում-սահմանազատում անելու մեջ չէ։ Երբ տեղափոխվում ենք այդ հարթություն, խաղում ենք իր խաղի կանոններով։ Առանց խաղաղության պայմանագրի սահմանազատման-սահմանագծման գնալը և դա ներկայացնելը որպես մեծ հաղթանակ, միանշանակ մանիպուլյատիվ է»,- ասում է նա։

Ըստ Արամայիս Աղաբեկյանի՝ Ադրբեջանը նպատակ ունի ոչնչացնել Հայաստանի պետականությունը, և ոչ մի սահմանազատում չի կասեցնի նրա և Ռուսաստանի այդ ծրագիրը։ Նա ՀՀ-ն Ադրբեջանի և ՌԴ-ի միջև կիսելու վտանգ է տեսնում։ Ըստ նրա՝ հաջորդ պատերազմը կարող է սադրվել «Զանգեզուրի միջանցք» ստանալու նպատակով։

Արամայիս Աղաբեկյանը պնդեց, որ իրավիճակի լուծումը Հայաստանի միլիտարիզացիան և պատերազմին պատրաստվելն է։ Նա խոսեց նաև Տավուշի թեմի առաջնորդ Բագրատ արքեպիսկոպոս Գալստանյանի և նրա ղեկավարած գործընթացների, ընդդիմադիր ուժերի՝ այդ գործընթացին ներգրավված լինելու, Հայաստանի և Ռուսաստանի իշխանությունների՝ ՀԱՊԿ-ի և ԼՂ-ի կոնֆլիկտի համատեքստում եղած հանրային բանավեճերի, Պուտինի և Փաշինյանի՝ Մոսկվայում ծրագրված հանդիպման և դրանից սպասվող արդյունքների, այլ հարցերի մասին։

Հարցազրույցն ամբողջությամբ՝ տեսանյութում։

Ռոբերտ Անանյան