Քաղաքաշինության կոմիտեն և «Ներդրումների աջակցման կենտրոն» հիմնադրամը կսերտացնեն համագործակցությունը

Քաղաքաշինության կոմիտեի նախագահ Եղիազար Վարդանյանը հյուրընկալել է «Ներդրումների աջակցման կենտրոն» հիմնադրամի գլխավոր տնօրեն Լևոն Օհանեսյանին և հիմնադրամի ներկայացուցիչներին։

ՀՀ քաղաքաշինության կոմիտեից տեղեկացնում են, որ քննարկվել են քաղաքաշինության ոլորտում ներդրումային ծրագրերի իրականացման շրջանակում համագործակցության հարցեր։

Ըստ աղբյուրի՝ կոմիտեի ղեկավարը կարևորել է հիմնադրամի փորձը՝ վերհանելու համար խոչընդոտները, որոնց բախվում են ներդրողները քաղաքաշինության բնագավառում, և պատրաստակամություն հայտնել համագործակցելու ներդրումային դաշտի բարելավմանը նպաստող նախաձեռնություններում։ Նա տեղեկացրել է արդեն իսկ նախանշված աշխատանքների մասին, որոնց արդյունքում կհստակեցվեն քաղաքաշինական գործընթացները ինչպես խոշոր ներդրողների, այնպես էլ քաղաքացիների համար։

Նշվում է, որ Լևոն Օհանեսյանը ներկայացրել է «Ներդրումների աջակցման կենտրոն» հիմնադրամի գործունեությունը, կոմիտեի հետ արդյունավետ գործակցության փորձը և վստահություն հայտնել, որ ձևավորված գործընկերային փոխհարաբերությունները նոր լիցք կստանան։ Նա անդրադարձել է Հայաստանի վերաբերյալ ամբողջական պատկերացում կազմելու նպատակով ներդրողների համար մշակվող էլեկտրոնային հարթակին։ Այդ համատեքստում դիտարկվել է կոմիտեի նախաձեռնությամբ քաղաքաշինական թվային կադաստր ձևավորելու դեպքում համակարգերի ինտեգրման հնարավորությունը։

Կողմերը պայմանավորվել են շարունակել սերտ աշխատանքը՝ նպաստելու համար քաղաքաշինության բնագավառում ներդրումային դաշտի բարելավմանը։